Samuel o Maurice

 
Estomagada a Montréal. Lei "conservateurs" vòlon chanjar lo nom dau pònt Champlain. 

Aqueu pònt sus lo Saint Laurent èra estat mau concebut e mau bastit e duou èstre remplaçat, au meme endrech.

Drech anar, lo novèu duvrié prendre nom de Pònt Champlain, o Samuel de Champlain, mai non, sarà batejat "Pont Maurice Richard".

La decisien  vendrié d' Ottawa, la capitala federala.Vai comprendre.

D'ente si destrauca aqueu Maurici ? Rèsta lo melhor jugaire (dison lei Quebequés) de l'istòri dau hockey.

Faguèt de belugas dins leis anadas 50 emé lei Canadiens de Montréal, aquela equipa es encara una dei melhoras dau championat nòrd-american.

Gròs çaganh dins lei quotidians "le Devoir" e  "la Presse", a Radio Canada.

Lei medias e l'òupinien publica dins sa majoritat bramon. Dau temps qu'èri a Montréal, lo Promier Menistre quebequés Couillard avié dejà chanjat d'idèia.

Era pas pus favorable au nom de Maurice Richard ; una reculada de promiera faci a la contestacien quasi generala contra la demagogié.
 
Parèisse que lei conservators vòlon virar l'esquina a la França e au passat francés de Montréal et de "la Belle Province". Mens conoissut encuei que Jacques Cartier, Samuel de Champlain, naissut en Charente, es pasmens lo fondator dau Canada francés, au nom dau Rei.
 
Se voliam faire parier en Euròpa, faudrié que si decidèsse que la plaça Charles de Gaulle a Paris prendrié lo nom de Just Fontaine, aqueu qu'a marcat 13 buts au Mondiau de Sueda en 1958 e que garda encara lo recòrd…  o que la via Vittorio Veneto a Roma venguèsse via Materazzi, qu'a fach ganhar lo Mondiau 2006 ais Italians... o que la plaça Garibaldi a Niça venguèsse plaça Camille Muffat, medalha d'òr ai J.O de natacien.

Ma compareson es gaire eisagerada. L'Istòri a passat de mòda, a l'escòla e dins leis ostaus. Dau temps que lei muscles travalhon, la cervèla si pòu pauvar.
 
Vos dirai la decisien definitiva a prepaus dau nom dau novèu pònt. Espèri qu'aqueu d'aquì tendrà drech.