Potonadas de HTL

Acabava lei letras que mandava a la familha mé de "Poutounades". Era pas un mòt pescat a l'asard. Parlava correntament occitan, Henri de Toulouse Lautrec,  emé seis amics roergats e leis emplegats dau castèu dau Bòsc que patissien en francés. 

Es sa rèira-neboda Nicole Tapié de Celeyran que m'òu diguèt lo jorn que m'aculhèt au Bòsc, sus la comuna de Camjac en Avairon, en companhié de mon amic Gabi Espié qu'avié fach lo guida aquì dins sa joinessa. Per ieu, Henri de Toulouse-Lautrec èra lo geniau pintre parisenc que promenava sei pincèus entre "le Lapin Agile" e "le Moulin Rouge". Mai son estacament au Roerga, a son parlar e a son biais de viure es estat centrau dins sa corta vida.
 
Mon rescòntre emé lo "grand pichon" Henri avié començat en avost au musèu Toulouse-Lautrec d'Albì. Sa recenta restauracien es una capitada e totei aquelei que s'interèsson a la vida e a l'òbra dau mèstre li duvon anar. La visita dau Bòsc n'es lo complement òubligatori. Henri li venié cada estiu. Dins caduna dei salas dau castèu de fotòs, de dessenhs, de pinturas, de juguets, d'aisinas, de letras evòcon aqueu temps que s'acabèt en 1901 a sa mòrt.
 
Naissuda en 1925, Nicole avié quatre ans quora Adèle, sa grand-tanta, maire dau pintre, morèt. Pasmens aguèt de nombros testimònis de membres de la familha que totei  badavon l'oncle Henri tant era gènt e galejaire. "Faites chahut" conselhava ai dròles.

Aurié degut eiritar d'aqueu castèu e de son jardin au mitan dei prats, mai a sa mòrt son paire lo donèt a Alix, sòrre d'Henri e rèire-grand de Nicole qu'encuei n'es la proprietari.
 
Graci au sucès dau filme "Moulin Rouge" sortit en 1953, l'interès per HTL creissèt e lo castèu siguet durbit ai visitas. D'estiu encuei de joines de Camjac fan lei guidas e lo restant de l'an, Nicole, la memòri viuta d'aqueu bèu castèu, acuelhe lei privilegiats que fan lo romavagi.

A prepaus de romavagi, faguèri tambèn aqueu de Mureth, vuech jorns avans lo 800en aniversari de la desfacha qu'avié empachat la naissènça d'un estat occitano-catalan. Raimond VI, avi dei Toulouse-Lautrec, menava la batalha emé lo Rèi d'Aragon que siguèt tuat.

Doei monuments nen marcon lo luec supausat. Son ara au mitan d'un cairefòrc vira-vira dins un quartier residenciau de la banlega de Mureth. Duou riscar de si faire esquichar per lei veituras aqueu que si vòu reculhir e legir leis inscripciens en occitan.

Un lotiment vesin es nomenat "Aragon", mai siam dins lo quartier de Gaulle, dau nom dau licèu vesin. Sarieu estat cònse de Mureth aurieu pas donat un nom de generau au licèu vesin dau prat batalher. Aurieu prepausat au consèu lo nom de lycée Henri de Toulouse-Lautrec.