partager
Amé tres difusions lo documentàri televisuau Provence l'autre débarquement a coneissut un succès qu'aviá jamai agut Crestian Philibert.
En tres difusions entre lei 15 e 20 d'avost 2014, una l'après dinada, l'autra a dètz oras de la nuech e una en plena nuech, li aurà aguts un million de telespectators per agachar aqueu film d'archivas fòrça ben bastit. Un DVD seguirà.
Lo cineaste d'Afrikaïoli e dei Quatre saisons d'Espigoule, l'oblidam tròp, es tanben un documentariste afogat d'Istòri.
Son Complexe du santon resta dins lei memòris occitanistas, bòrd que fa, am' una bèla economia de mejans, l'istòri de la representacion de l'òme miegjornau dins l'imaginàri francès.
Amé L'autre débarquement, perseguis dins aquela vena ; fa vèire un ponch de vista provençau sus un eveniment màger escondut per lo « Jorn J » de Normandia.
Am'aqueu la Liberacion arribarà mai leu
« Amé l'istorian Laurens Moënard, mostram que lo desbarcament de Provença a capitat benleu d'acabar la liberacion nacionala mai leu » que nos ditz Crestian Philibert.
L'idèa principala ben sotalinhada, es que leis armadas francesas, essencialament compausadas de pè nègres, de tiralhors argerians e de tabors e gomiers marrocans, auràn liberats Tolon e Marselha amé quasi tres setmanas d'avança sus lo cartabèu militàri previst.
« S'es fach au pretz de plen de mòrts, en particulier amé la destruccion d'una partida de Tolon onte lei combats siguèron murtriers. Mai leis armadas aligadas an coma aquò poscuts dispausar dau Pòrt de Marselha mai leu. E aquò siguèt essenciau per lo provesiment de totei aquelei tropas que marchèron puei fin qu'en Alemanha ».
Enfin reconeissut
Pasmens, per Crestian Philibert, aquela capitada publica siguèt pas una partida de plaser. Fasiá un an que discutava d'aqueu projèct sus l'Operacion Dragoon.
« MaiFrance 3 capitèt pas de boclar son budget per va faire, e finalament es en dos mes que siguèt fa dins l'urgencia, lo film ». Deviá pasmens èstre ben escrich, qu'aquela urgencia se vei pas a l'escranh.
Per lo cineaste, que trabalha fòra dei sendiers trevats
, vaqui una escasença d'èstre enfin reconeissut per una cadena coma France 3. « Coma documentàrista e pas mai », que nos modera.
E de sotalinhar, per exemple, que, fòra deis usatges, a pas poscut aprofiechar d'una ajuda dau Servici d'archivas de l'Armada, e pas manco de la simpleta mesa a dispausicion a gratis d'aqueleis archivas, que li a faugut pagar.
Es que la valorisacion d'aquel « autra » desbarcament desranja jusqu'à seis ereitiers ?
Le nouveau calendrier 2023 de Georges Souche
