partager
Dins l'encastre del collòqui Tornar legir Joan Bodon organizat per Joëlle Ginestet a l'Universitat Joan Jaurès de Tolosa, la pichona vila de Naucèla (Avairon) recebèt lo 22 d'octòbre l'eminent professor Fritz Peter Kirsch vengut de Vienna per donar una conferéncia apassionanta sus l'òbra de Joan Bodon.
Comencèt son intervencion dins un occitan dels mai plasents abans de contuniar en francés. Nos mostrèt consí l'òbra de Bodon se ven installar dins una produccion literaria occitana que se deu legir dins una situacion de dialòg ambe la la literatura exagonala sens i èsser assimilada. F. P Kirsch nos contèt consí, dins las annadas 60, quora èra un jove estudiant aluserpit, aviá fach lo viatge despuèi Vienna fins a Complibat en Roèrgue, en petroleta per venir rescontrar Enric Molin, d'aquí contunièt son viatge fins a Sant Geniès d'Òlt, ont lo jove Bodon èra mèstre d'escòla caminaire, per acabar sa corsa a Montpelhièr en cò de Robèrt Lafont. Un polit exemple de l'interès que suscita nòtra literatura occitana en defòra de França !
Per acabar la serada Arnaud Cance nos cantèt qualques tròces causits de la poesia de Bodon a la guitarra e al surpèti, ambe de melodias renoveladas, pel plaser de totes.
Lo demai del collòqui se's debanat a Tolosa, a l'Universitat Joan Jaurès los 27 e 28 d'octòbre.
Lo libre de la setmana : Mémoire des lieux - Noms de lieux dans le Comté de Nice et en Provence orientale - Daniel Georges - Racines d'une identité.