Nancy a le torticolis

Lo 9 d'avost 1944, la BBC difusava aqueu messagi qu'avisava la resistènci provençala dau jorn dau desbarcament, lo 15 : "Nancy a le torticoli".

Mai donava pas lei luecs ente si farié, bessai de paur que leis Alemands s'agantèsson l'informacien. 

Leis Estasunians avien trovat la solucien per si parar deis escotas alemandas. 

Totei lei trasmissiens radiò entre lei divisiens de l'infantarié US que prenien pè sus la sabla de Santa Massima, de Cavalaire, dau Dramont si fasién en osage, la lenga deis Amerindians Sios e Comanche.

Leis enemics podién corre per comprendre e aquò de segur a permés la capitada dau desbarcament.

Per lei 70 ans de la liberacien de la Provença convenié de faire una capelada ais Indians d'America ; aquì avèm òublidat leis Indians dempuei que lei westerns an passat de mòda. 

Convèn tanben de faire la capelada ai locutors dei "pichòtei" lengas que luchon per lei gardar viutas, en nedant contra subèrna.

Cinc dau cent dei lengas mai parladas recampon lei 95% dei locutors dau monde. 

Resta 5% dei locutors per lei 95% dei lengas mens parladas. 

Aquò tèn pas còmpte dei bilengas e trilengas que son majoritaris en Africa. 

Nombros son aquelei que parlon francés, englés o portugués e la lenga de son vilagi. 

Dins 70 ans si podrié que 1% dei lengas mai parladas recampèsson 99% dei locutors. Leis umans auran lo torticòli de la lenga.

Coma si dirié Nancy a lo torticòli en osage? Quant de monde parlon encara osage en 2014 dins lei planas dau Middle-West ? 

Se lo desbarcament si fasié encuei trovariam d'Indians per parlar osage a la radiò ?