Misè Babilha s’entòrna de Normandia

Lo grope dei Misè Babilha s’entòrna de sa premièra tornada internacionala….qu’an passat lo Leir per anar fins qu’a Yport, sus la riba de mar de Normandia.
 
« Un moment remirable que nos an recebuts am’una bèla generositat, aquélei gents » se rementa amé plaser Magali Bizot, que canta tre l’origina dins aqueu grope de fremas.
 
Èron cinc amé lo tutor musicau que se son estacats, ara fai uech ans, Rodin Kaufmann, per cantar quatre còups : « tres dins de glèisas am’ un repertòri per partida religiós, e a la terrassa d’una beguda onte avèm pusleu causit de cançons mai profanas » ajusta Magali Bizot.
 

Eveniment màger, que nos ditz encara, Rodin Kaufmann a cantat am’élei. « Excepcionau ! L’aviam encara jamai viscut ».
 
Un bèu momenton siguèt aqueu qu’una corala de marins leis a rescontradas. « Le Chœur d’hommes d'Yport » nos a balhat una de sei cançons que nos a fòrça agradat, qu’es un cant de sardinièras en cauma, lei Penn Sardin que nos vèn de 1924. L’ajustarèm a nòstre repertòri e siam a la repetar ».

E lei chatas provençalas an agut l’escasença d’entendre lo dialècte francés dau Cauchois, « que, segur, es plus parlat que per lei vièlhs dau país, ailàs ! ».
 
Lo grope s’es ressarrat despuei un an. Siguèron fins qu’a quinge vaquí quàuqueis annadas, e encara dètz l’an passat. Ara li podèm comptar, levat de Magali Bizot, Cécile Van den Avenne, Lotty Thyssen, Camille Sappia e Noémie Saut.
 
L’an que vèn, tornaran a Yport, mai tre setembre, aquela còla, que demòra d’amators am’un bèu gaubi, cantaran dins Var Aut. Fa pauc, leis abitants de Selhans leis an ausits dins una vesprada consacrada a la contairitz e cantairitz Rose Salle.