Mèfi lo poton

Doas atletas russas que si fan lo poton boca contra boca sus lo pontin superior dau Championat Mondiau d'Atletisme de Mosco per la distribucien dei medalhas, aquò a pas agradat ai cataus de l'espòrt russo e bessai bèn a Potine en persona.

La conferènci de pressa per la medalha d'òr dau 4x400 m feminin es estada anulada e l'imagi dau dich poton es estada censurada a la televisien.
 

Probable que veirem pus jamai aquelei doas joinas fremas sus leis estadis me lo malhòt russo.
 

N'i a que diràn que lo poton a la russa si fa sus la boca. Degun a òublidat lo poton entre Krotchev e Gagarine a la sortida de la fusada, a si demandar se valié lo còp per Gagarine de s'anar pèrdre damont.
 

Per la federacien russa, lei doas "copablas" l'an fach per renar contra l'interdicien en Russia de mostrar publicament son omosessualitat, emé la gabiòla per lei contestataris. 
 

Mi pènsi que leis Estats de l'Unien Europenca duvrien refusar de mandar d'atletas ai Juecs Olimpiques d'ivèrn russos, en Crimèia en 2014, se aquèla omofobié istitualisada duvié èstre mantenguda.
 

Mai va faran pas nen sieu segur. Potine es pas un pichon peis, son gaz caufa la mitat deis Europencs. Lei drechs de l'òme e de la frema esperaran.