Lo prèmi Ostana maugrat la covid 19

“Dos jorns de live en linha sus lo site "premioostana", am’entrevistas, conferèncias, e totei que portaràn pèire amé seis òbras literarias, musicalas e artisticas. Aquesta annada lo partatge de l’interés serà numeric, conectat e multimedia, amb’aquò la convivència se debanarà a travers lo malhum sociau”.

Ansin lo prèmi anuau deis òbras en lengas mairalas Ostana, que bailèja la Chambra d’Òc, dins lei Valadas occitanas d’Italia, se farà maugrat l’empacha de la covid 19, que siguèt tant tarribla encò de nòstrei vesins.

Lo prèmi aviá crebat l’uòu en 2008, e èra l’oportunitat d’escambis entre autors de lengas minoritàrias dau monde.

Fau se rementar qu’entre lei premiats de 2018 li aviá agut l’autor nimesenc Matieu Peitavin.

Per la còla que baila lo prèmi Ostana (tanben es lo nom dau vilatge aupenc onte se debanan a l’acostumada lei rescòntres), “leis enjuecs que, dramaticament, siguèron mes en evidència par la pandemia de covid 19 siguèron sempre en mitan dei reflexions d’aquelei que s’ocupan de defendre la riquesa linguistica dins lo monde”.

Amé 7000 lengas parlada, entr’elei 40% en dangier de mòrt, segur, es d’actualitat de ne’n parlar.

Adonc, dos jorns, entre lei 5 e 6 de junh seràn consacrats en linha ai debats e autreis entrevistas d’autors sus aquelei tèmaticas.