Leis afogats de la lenga dreiçan sa lista

Un grand bracejament d’idèas que devon favorisar lei semenalhas de la lenga d’òc dins lei mitans lei mai divèrs, vaquí l’exercici collectiu qu’an temptats lei professors, artistas e regionalistas implicats de tota obediéncia, divèndres passat a Sant-Tropès. La Conferencia deis Arts e Espectacles lei convidavan per lo segond còp a s’exprimir de cotria per prepausar.
 
« Quand lo monde vòu aprene la lenga nòstra, i a plus degun per l’ensenhar. Adonc nos fau formar ». Aquò s’es entendut mai que d’un còp dins lei rèires salas de la Comuna, que recebiá una quarantena d’afogats, de bailes e de musicians.
 
E la tiera dei prepausiciens fa plaça an’aquela preocupacien. Ne’n trobam lei piadas dins lo catalòg de mesuras que lo moderator de la jornada a dreissat a la tota fin : formar d’animators amé lei municipalitats, gravar lo bilinguisme de’n pertot dins lei licèus a l’escasença d’una renovacien, sostenir d’atalhiers d’escritura en òc, lançar un apèu a projèct regionau per favorisar la transmissien dins lei familhas, formar d’actors culturaus e de jornalistas a la lenga regionala, enebir leis oraris impossibles dei cors de provençau (a l’ora de manjar, a la nuech…), adaptar en lenga de dessenhs animats, marcar lo bilinguisme dins la senhalisacien comunala, sostenir lei jornaus en lenga nòstra au nivèu regionau…e convencionar amé l’Acadèmia, en particulier la reculanta Ais-Marselha….
 
E son leis artistas dins una autra comissien, qu’an prepausat una incitacien a la bilinguisacien dins la programacien d’espectacles, l’afavoriment d’una mescla de disciplinas coma la dansa e la dramaturgia que podriá enclure de dichas en lenga, sostenir una programacien en occitan dins d’estructuras que prepausan d’espectacles en francès, una demanda ais autors d’integrar de partidas en provençaus a de prepausiciens artisticas que parlan de la Provença…

« Es riche tot aquò e, apr’aquela segonda reunien, me pensi que deuriem se revèire una tresena fes » aurà sotalinhat Felip Vittel, l’elegit regionau delegat ai Tradiciens Provençalas e a l’Identitat Regionala.
 
Aqueu dirà pereu que lo budget de sa delegacien, coma aqueu de la Cultura, créisse (mai 9% per la Cultura, aperaquí dos milliens per la cultura regionala…).
 
E, segur, se parlarà de l’absent d’aquela jornada, lo Colleitieu Prouvènço, que de son costat a pas chausit de chifrar amé leis autres. Eu mena sa barca a Chivau Blanc, dins la Vauclusa.

Ailà, lo Consèu Regionau consacra quasi 500 000 € a un projèct d’Observatòri de la lenga provençala, que bailèja sola aquela associacien.
 
Es la soleta, fòra dei discors, a disposar vertadièrament d’un budgèt consequent e assegurat.