
A Crestian Estrosi, lo president de la Regien Provença, que disiá la velha que 30% dei licèus avián pas de « referents seguretat » (una conferéncia de pressa dau 29 d'avost onte siguèt pas convidat Aquò d’Aquí), Bernat Beignier a indirectament respondut que chasque director d’escòla publica aviá donat son n° de telefonet personau. Un biais de demorar conectat d’un biais permanent amé l’informacien seguretaria.
Se lo rector crèi pas a « l’eficacitat dei velhas estaticas » davant leis escòlas, li agrada mai de veire lei còlas mobilas en mesura d’intervenir quatecant onte que siegue. Aquò dich, ne’n sabèm pas mai sus la realitat d’aqueu dispositiu, senon qu’un comandant de poliça, Teiriç Laumonerie, baileja per lo Rectorat tota la seguretat.
« Lo terrorisme, segur, nos ocupa, mai l’ ànsia perceptibla dei mestres tanben » nos vèn lo policier. Se l’intrusien de calachnicovistas afogats de Dieu, chascun li pensa, es premiera aquela de parents maucontents que fa lo quotidian dei mèstres d’escòlas provençaus coma dau referent rectorau de seguretat. Lo fenomèn es una realitat de chasque jorn, e leis establiments escolaris son pas un sanctuàri onte lei ensenhaires serián intocables.
Volontat de se rassegurar

« L’i a de país onte aquò se fa despuei d’annadas, coma Israël » sotalinha segur Bernat Beignier, mai onte li son acostumats.
E encara, se, per ce qu’es de la setmana escolària, aqueu dispositiu es au mens establit, degun sembla saupre ce que se debanarà lei miegjornadas setmanieras d’animaciens peri-escolàrias, am’un personau pas tant sensibilisat.
La volontat de rassegurar es benlèu l’element lo mai important d’aqueu dispositiu rectorau.
Ansin, quand leis adjonchs dau Rector dison que « lo personau d’acuelh, segur son pas abilitats a furnar dins lei saquets, mai pòdon enebir l’intrada au monde que laissa pas sa carta d’identitat ».
Segur qu’aquò maucorariá un Kouachi o un Merat, bèn acompanhats e bèn equipats per chaplar una cort de recreacien !