La lengo nouastro s’entouarno eis escolo de La Ciéuta « émé metodo »

« Fau bèn dire que partèn de rèn ! Se parlo plus la lengo à La Ciéuta ; l’escolo l’aprèn plus nimai ; es aro un desert, alor que fa vint-e-cinq an, la vilo èro en pouncho ». Va regreto, Mirèio Benedetti. La counsoulo ajouncho à l’Educacien de la coumuno bres dóu cinéma fara pas d’ estampèu pèr reviscoula lou prouvençau, mai vous mandara uno d’aquéleis oundasso de lengo nouastro touarnara curbi la vilo per d’annado.
 
Afaire de voulounta ourganisado. E partejado.
 
De mestié counsèu en management, aquelo elegido es acoustumado à mena de proujèt d’à founs. Li mancavo plus que de rescountra la voio de mounde loucau pèr faire s’entourna la lengo d’O eis escolo de la coumuno.
 
« Vouliéu de councrèt, de soulide, e crèsi que l’avèn ! » nous a declara tout subran, l’elegido. Aquest estiéu a fa un tour de taulo emé d’assouciatiéu que l’an counseiado, en particulié l’Assouciacien pèr l’Ensignamen de la Lengo d’O. E à la touto fin d’avoust, a acampa, coumo de coustumo, touto la coumunauta educativo de La Ciéuta. Quàsi dous cènt persouno : de mèstre, de persounau d’ajudo coumo leis ATSEM, d’ispeitour de l’Educacien Naciounalo, e leis intervenèire d’animacien peri-escoulàri. 

E aquélei seran uno pèço essencialo pèr faire tourna la lengo à l’escolo.

« Premié avèn rescountra un franc estrambord de tóutei, puei de mounde assabenta a bèn vòugu douna la man ».
 
Toni Olles, aqui tant counouissu coumo lou loup blanc, o lou pouèto Roubèrt Aymard, qu’a tradu en lengo Marcèu Pagnol. O encaro un afouga de l’óulivié, Danis Roux.

« Seren tres pèr fourma de persounau qu’anaran puei dins leis escolo » que nous dis aquéu. « Avèn passa la fin d’estiéu à establi de ficho tematico : pèr eisèmple sus lei vendumi , o l’acuei deis escoulan en prouvençau… Em’uno toco : voulèn que siegue paupable ».
 
Lei fourmacien se debanon à la Bastido Marin, uno prouprieta de la Coumuno, ounte « la cousino èro l’escasenço de parla emé leis animatour de nouaste envirounamen councrèt de sieto , d’ oulo e de sartan  » ajusto Danis Roux.

E deman, animatour dóu peri-escoulàri e ensignaire poudran ansin faire douos ouro semaniero de prouvençau. Lei voulountàri mancon pas.

Es que, councebudo pèr tout aquéu mounde, « la revengudo dóu prouvençau eis escolo de La Ciéuta sera traversalo, e mai que tout, facho pèr s’amusa » estimo dono Benedetti.
 
Es que l’enjue es de trìo : de dous a tres milo escoulan poudrien èstre pertouca, e entendre o aprendre la lengo dóu païs.
 
Pèr aquéu resultat que mai que d’un espèro, falié bèn uno coumunauta escoulàri qu’aguèsse l’envejo de camina de coutrìo.
 
« E nous fa besoun d’estrutura lou proujèt pèr s’assegura que chascun li trobe sa plaço, e garde drudo l’envejo de countunia ».

Crouso lei det, Mirèio Benedetti. Mai va sabèn tóuti, lei meiouro chanço son bèn aquélei que sabèn ajuda emé metodo.

Article rédigé en provençal maritime, graphie mistralienne, avec les suggestions lexicales d'Alain Barthélemy-Vigouroux.