Aqueu Var ounte “es mort lou prouvençau”

Li grand founciounàri deurien bèn se faire acoumpagna per èstre segur de pas dire publicamen de contro-verita. Coumo per eisèmple afierma que dins Var lou prouvençau es mort, à l’escolo.

Pamens l’avié ansin declara à France 3, la televisioun regiounalo de Prouvènço lou Reitour d’Acadèmi d’Ais-Marsiho : “ lou prouvençau a despareissu dins lou Var e lis Autis-Aup”, coumo l’a difusi l’emissioun en lengo nostro Vaqui lou douge de setèmbre passa.

Coume s’agis dóu Reitour d’Acadèmi, poudèn bèn pensa que voulié parla d’uno desparicioun de l’ensignamen. Es aqui que fau rementa que pamens li cours de prouvençau eisiston bèn entre lou flùvi Var e Santo Baumo.

Eric C. serié bèn estouna de saupre que si cours de Cuers coume de Touloun eisiston pas, e pas mai l'escolo bilinguo de la ciutat ; e qu’à Ièro Natalio B. ensigno pas lo prouvençau au licèu, qu’à Sièis Four lou coulègi fa pas classo pleno de prouvençau, e qu’à Draguignan Agnès C. n’en fa pas mai au coulègi. Coumpletan lou tablèu disènt qu’à Aups tambèn s’ensigno la lengo nostro, qu’à Mountaurous fa d’an qu’un proufessour cerfica ensigno l’óucitan-lengo d’O, coumo dison li tèste óuficiau, au licèu dóu Muei tout parié, e meme qu’à Faiènço se duerb aquelo rintrado un cours ei licean, que soun sege en segoundo, ce qu’es pas tant mau.

Em’acò segne Reitour, vous auren servi de bono infourmacioun. Poudèn vous recoumanda de n’en parla à voste coulègo de l’Acadèmi de Niço. Espèri que per delicadesso ja vous aura fa passa un bihetoun emé la bono infourmacioun.

Coume acò, lou cop que vèn, à la televisioun, vous enganarés pas, e lou mounde varés que li agrado tant d’aprendre la lengo dóu païs, se veira simplamen recouneissu. E acò, sabès, es pas pus mau.