partager
Despuei si dètz e vuech ans, Lissandre Varenne pausa son micrò, puei son camescòp, davant de vielhs qu’an en comun de parlar la lenga nòstra. “Oh ! Crèsi que pòdi ne’n comptar de centenas, que ara fa vint ans que lei rescòntri”.
Lo trentenari afogat de memòria populari viu a l’ora d’ara en Margerida, sus lei plans ennevassats
d’Auvernha, onte trabalha dins l’administracion de l’Educacion Nacionala. E sei dimenjadas lei passa a son leser, en meme tèmps una mission.
Mai se collectar a pas de prètz, a un cost, e son salari pòu pas tot. “Fau ben vèire qu’ai necessitat, au ponch que ne’n siáu arribat, de discs durs de granda capacitat, d’un camescòp a nivèu, e de poder m’ostalar
quora me desplaci per un rescòntre”.
Amb aquò a començat de chifrar
coma trobar lei mejans : “fau ben dire que totei leis organismes publics qu’ai picat a sa pòrta, emai aquelei que fan mestier d’ajudar a l’occitan, m’an opausat lo manca d’argent. Alòr lo finançament participatiu m’a semblat lo mai segur.”
Donar la paraula an aquelei que jamai degun escota
Lançat fa una setmana, lo kiss kiss bank bank a deja acampat una polida soma. E s’acaba a la meitat d’abriu. Adonc a bòn espèr de capitar l’acampat dei 5000€ que demanda au monde.
E comença d’i crèire vertadièrament. Li fa plaser, vertadièrament pereu, bòrd qu
’amb aquelei dardenas
, Lissandre podrà “valorisar aqueu monde que, de còps que li a durant tota sa vida, degun li a laissat la paraula, bòrd que parlava la lenga que deuiá escondre!” Lo pièger : “quora sei propreis enfants devalorisan la lenga d’aquelei vielhs”
Leis ancians que degun carcula, per aqueu trentenàri afogat, son de monde passionants, carrejaires d’una cultura meravilhosa, que s’agis de pas perdre.
A l’ora d’ara podètz ja mirar lo trabalh de Lissandre Varenne amb lei quauquei tròç que publica sus sa cadena Youtube e son facebook. Mai segur vòu anar mai luenh. “Pensi publicar per totei una ben mai granda part de mei collectatges que lei benlèu 2% que pòdi mostrar a l’ora d’ara...E mai que tot utilisariá aquela fònt abondosa per faire de documentàris”.
Una fònt de testimònis fantastica
E, a prepaus...per va faire li faudriá un logiciau professionau de montatge videò. Amb aquò podrà tanben sotatitolar sei filmes. Alòr sabètz coma ajudar aquel enfant de Provença qu’a plantat cavilha dins lei montanhas a vacas…
Despuei lei prats onte resta ara, s’alegra d’aver rescontrat lo monde dau Felibrige, ont’a pres sei premiers cors de lenga nòstra, avans que, de viatges en sejorns, amé lei vielhs, amolar
sa larga coneissénça de l’occitan, d’entre Piemont e Avairon, fins qu’ara lo relarg onte tanca son camescòp.
Disparition : Fabienne Garnerin la pédagogue investie
