Un pòrta-paraula au Salon

Lo Salon de l'Agricultura es un eveniment mediatique major, mai encara mai pèr leis òmes (e lei fremas) politiques que pèr lei païsans. Un jorn non l'autre, un agricultor si lèva la vida en França, mai es pas aquel imagi que lei medias vòlon mostrar.

La velha de l'inauguracien, lo Grand Jornau de Canal + avié convidat doas dei mai polidei paisanas de nòstre territori (e pas colhonas en mai d'aquoò.

Una blonda sindicalista dau Gèrs e una bruna pastressa dau Nòrd representavon una agricultura francesa, joina, bèla e modèrna. Aqui lei vièlhs e lei pas polits an pas sa plaça, questien d'imagi e d'audienci.
 
Mi radassavi encara au liech, lo lendeman, que lo presidènt Hollande avié ja vist mòuse lei vacas au "Salon Internacional de l'Agriculture", avans meme la dubertura au publique.

"France Inter" nos va contava au jornau de 8 oras. Au JT de 13 oras de France 2, Hollande en dirèite avié pas encara acabat sei rogasons au Salon, promenava au mitan dei produchs gastronomiques regionaus.

Aqueu pavalhon es lo preferat dau publique. Lo presidènt lo devié pas mancar.

Tastar e s'avisar qu'un cambajon dau païs de Bigòrra ente lei pòrcs negres de vièlha raça corron en plena natura mai de 15 mes de sa vida, a ren de veire m'un cambajon anonime, vengut d'un pocieu ente pòrcs, trueias e porquets son esquichats coma d'anchòias, es aisat.

Pas besonh d'èstre critique au guide Michelin pèr posquer faire la diferènci... Comparar emé la charcutarié industriala es aisat estènt que « la granda distribucien » es ara presènta au Salon, en bòna plaça, dau tèmps qu'estrangla lei productors que fan pache m'ela.
 
Au Salon 2014 François Hollande avié passat mai de sèt oras. En 2015 a batut son recòrd, parèisse que n'a passat uech.
 
Cada annada, l'inauguracien es saupicada d'eveniments imprevists. Aqueu còp, lo pòrta-paraula de la "Confédération Paysanne"  convidat per dialogar mé lo Presidènt, s'es fach bolegar.

Lei balès de la securitat presidenciala « rapprochée », qu'an mai de muscles que de cervèla, l'avién pres pèr un manifestant. Sabon pas triar lei nivèus de contestacien. Se romegues t'embarqui. Un mòt de traviòla dau barbassut de la Conf' lo podié menar drech au forgon de polici, a la gabiòla puei au tribunau. Mai aquì, Hollande a arrestat l'auvari e lo sindicalista a escapat au forgon. An poscut puei parlar ensèms. Que si son dichs?
 
Jamai l'oposicien entre FNSEA-CNJA d'un caire e  Confédération Paysanne de l'autre siguet tant fòrta.

Lo Oc o lo Non ais OGM n'es l'eisèmple lo mai evident. Mai au Salon leis organisators vòlon escondre aquelei garrolhas pèr mostrar, dins una faussa unitat, lo melhor e lo pus bèu de sei gents, de sei bèstis, de sei produchs.

La bèla vaca roja flamanda « Filouse » de l' aficha òuficiala va simbolisa. Donarà mai son lach d'abondanci sensa bolegar.

Porte de Versailles, l'aparenci d'un monde rurau ideau, en defòra dei revolums de nòstra epòca,  ven remplaçar, un còp de l'an pèr lei visitors ciutadans, la malastrosa realitat d'una majoritat de païsans que travalhon mai de 70 oras a la semana per ganhar de regardèlis.