Un Top 14 coma en 14

Mont-de-Marsan e Agen s'en van, Brive e Oyonnax desbarcon dins lo championat 2014 de rugbì.

Pèr lo caganìs Oyonnax, lo mens riche de totei, cadun dei rescòntres sarà una sortida dei trencadas, coma en 14, e podèm crenhe una cascada de piquetas, aquò es arrivat ai Montés l'an passat.

Lo desequilibre entre lei grands e lei pichinets gasta l'interès dau championat mai a una autra consequenci malastrosa.  

Una darniera plaça au Tornei dei Sièis Naciens puei tres desfachas en Nòva-Zelanda vaquì lo rendut còmpte gaire glorios d'una fin de seson 2013 de nòstre XV nacionau.

A cargat la biaça a Christchurch em'una fannì de 30 a 0. Podriam criticar lei chausidas de l'entrenaire dromés Saint-André, la marrida forma dau Tolonenc de Tolosa Michalak, dau Tolosan de Tolon Maestri (se cadun restava au sieu sarié bessai miés).

Podriam trovar l'escusa qu'aquela virada luenchenca venguèsse après un Championat e una HCup crebants pèr leis organismes dei Blus.

La reson promiera d'aquela cagada vèn, a mon ideia, dau recampament dei melhors jugaires mondiaus dins nòstre Top 14 (promiera divisien professionala, pèr aquelei que sabon gaire dau rugbì).

Es ensin que de titularis atuaus de l'equipa de França fan sovent tapissarié dins son club, en regardant jugar leis estèlas vengudas d'Africa, d'America e d'Oceania mai tamben d'Engletèrra, Gallas, Escòssa, Italia e Georgia... Clarmont, Tolosa, Tolon, lo Racing son leis equipas lei mai richas dau monde e vuejon lei championats dei cinc continents de sei melhors elements. 

Podèm pas empachar lei clubs d'aguer de sòus e de faire sei crompas.

Chanjar sei reglaments permetrié d'arrestar aquela corsa caluga ai dollars, euròs e sterlinas.

Limitar lo nombre de jugaires forestiers sus lo terren en òublijant que n'i ague au mens tres o quatre venguts de l'escòla locala de rugbì sarié una solucien aisada de metre en plaça.

Aquò agradarié bessai pas a Canal + que dona de molons de sòus pèr si pagar lei drechs de difusien e que vòu d'estèlas sus lei pelens.