Un IEO Provença per de projècts interdespartamentaus

Dissabte 16 de febrier lei sòcis de l’Institut d’Estudis Occitans de Provença Aups e Còsta d’Azur s’acamparàn a z-Ais per l’assemblada generala d’aquela associacion que foncciona en Federacion. Per son vici president Joan Pèire Baquié, « es jamai qu’un deis escalons de l’estructura, mai bèn util per coordonar, e tanben per que lei gents que se veson jamai si pòscon rescontrar embé d’autrei que menan batèsta dins lo meme sens ».
 
Lo president de l’IEO 06 tèn, segur, lo trabalh locau coma una òbra màger, mai « li a de projèctes que se pòdon menar qu’embé de competéncias que fau acampar sus un territòri mai grand. » Per exemple, nos parla dau chantier de la toponimia qu’a permés, fa quauquei mes, de presentar una carta de Provença entiera embé de noms dins sa grafia normalisada. Ara li aurà de noms de luec per lei premiers cònsols que vodrián endraiar una politica de bilinguisme dins lei noms de l’endrech.

Mai subretot es dins lo domèni de la pedagogia que l’IEO Creo Provença sèrve en totei. « Fa dos ans que publica la revista per pichons Papagai, embé l’ajuda de mai d’un sòci, siegue per adaptar lei tèxtes en aupenc, siegue en niçard… » per n’en faire una revista que se pòsque legir per mai d’un niston entre Ròse e Monegue. « Aquò còsta car e nos faliá mutualisar au nivèu regionau lo trabalh, e la subvencion dau Consèu Regionau. Mai es una ajuda per lei ensenhaires », e un plesir per lei joines.
 
Segur que venir de Niça jusqu’à z-Ais onte se debanan leis acamps dau burèu de l’IEO Paca, lo fau voler e « manjar de kms ». « Mai coma fèm que quatre acamps l’an, emai l’AG, rèsta possible ». Embé lei mejans telematics, lei desplaçaments sont pas tant nombrós. « La setmana passada un dei responsables fuguèt malaut, es restat au sieu, e avèm fach l’acamp embé « Skype », lo logiciau de telefonia a gràtis.
 

Assemblée générale des adhérents de Provence Alpes Cote d'Azur à Aix-en-Provence samedi 16 février 2013 à partir de 14h à l'Ostau de Provença, parc Jourdan.