Retour devers l'estage de Prouvençau Lengo Vivo

« S'erian subretout arresta pèr di proublèmo de dardeno, qu'erian en plein dins la criso » justifico Paulin Reynard, presidènt de l'assouciacioun.
 
Mai uno nouvèlo edicioun renais, dins la countinuita dis anciano. Se trato d'uno animacioun tradiciounalo despièi 2001, que s'adreisso i jouine de 13 à 25 an.
 
Durènt quatre jour, tout i passo : charradisso, danso, cant, musico, cousino... Es aqui l'óupourtuneta pèr li jouines óucitanoufone de se recampa, d'escambia e, perqué pas, de se perfeiciouna la lengo e la culturo !

« Avèn degu desroumpre aquélis estage en 2014 e 2015 » : Paulin Reynard regreto la debuto pau dinamico dis iscripcioun, maugra la capitado dis edicioun passado. Lou proublèmo estènt que « après dous an d'arrèst, es dificile d'empli ».
 
Es pèr acò que l'assouciacioun n'es toujour à cerca d'estagiàri pèr aquest an. Es poussible de s'iscriéure bono-di lou doursié de candidaturo d'empremi, que poudès trouba aqui : http://prouvencaulengovivo.free.fr/stage.htm#inscription.

L'estage se debanara dóu dimènche 3 au dimècre 6 d'abriéu. Es limita à 30 plaço, e lou delai d'iscripcioun es aluencha. Lou près de l'estage es de 120 €, pòu èstre moudifica'mé uno ajudo de la CAF e lou pagamen se pòu escalouna. Pèr mai d'entre-signe, escrivès à prouvencaulengovivo@free.fr