Omenatge de l’IEO a Bernat Moulin : lexicografe de tria dau provençau e òme discret

Quora es mòrt en 2020, lo Congrès Permanent de la Lenga Occitana veniá de metre en linha una gramatica occitana dau provençau, que Bernat Moulin ne’n aviá bailejat lo trabalh. Lo diccionari “de basa” dau provençau de l’IEO (2004) èra en granda part son òbra e trabalhava a sa reedicion en version en linha quand la mòrt l’a sosprés. Despuei l’IEO Paca a mes en linha aquela nòva version.

“Era un pescaire de cada ocuréncia,” ajusta Pèire Brechet, “descavava tot d’una paraula : onte, quora s’èra emplegada, e per quau…! Era un arqueològue dau lengatge que s’interessava au tèmps de la paraula, de son istoricitat… Segur que per escriure tres linhas seguras, li faliá tanben tres jorns”.

Miltant de la premiera ora dau reviure a l’Institut d’Estudis Occitans, Bernat Moulin aviá començat per trabalhar amé lo Comitat d’Estudis Sestian dins leis annadas 1970, e èra present dins totei leis iniciativas occitanistas de Provença : un atalhier de lenga a l’Ostau de Provença d’Ais, de consèus de donar ai collègas dau Cafè Provençau d’Ais, una participacion au chantier dubèrt per Guiu Martin sus la lenga parlada a Cucuron… mai tanben dins l’ombra, lo sosten ai escrivans que va demandavan.

Coma sa despartida, au moment dau confinament generau de la prima de 2020, lo fasiá pas possible, Bernat Moulin aviá pas poscut aver l’omenatge qu’an agut sei fraires aparaires de la lenga, o que lo monde occitanista a rendut a sa collèga Ana Maria Poggio fa un an. Totei se disián qu’après la periòda fosca, un omenatge public li seriá rendut.

LO PROGRAMA DAU 23 SETEMBRE

Serà causa facha a s’Ais lo disabte 23 de setembre a l’Ostau de Provença (Pargue Jourdan) amb aqueu programa : 14h a 16h: Omenatge ambe de presas de paraula de seis amics qu'an obrat amb eu;
16h: Projeccion dau film Un théâtre dans la ville e escambis ambe lo realisator, André Neyton (director artistic dau Teatre de la Mediterranèa);
18h Concèrt polifonic ambe lo grop Tant que li Siam;
19h Concèrt e balèti ambe lo Duo Montanaro.

(Es de notar que, a 15h, Liza l'occitana prepausarà un espectacle per leis enfants a l'exterior de l'Ostau)