Après lou visioacamp di representant de l’escolo assouciativo en inmersioun, lou 15 de setèmbre emé lou premié menistre Jean Castex, la Federacioun d’ensignaire de lengo regiounalo en Franço reno de pas se vèire trata em’egalita. Representon l’ensignamen publi e au nivèu óucitan li soun soci la Federacioun di Ensignaire de Lengo e Culturo d’O (Felco). « Reprensentan li tres quart di mai de 100 000 escoulan que seguisson un ensignamen en lengo regiounalo (bilengo e inmersiu, l'inmersiu estèn mai feble que dins l'associatiu, ndlr). Es l’Escolo Publico e l’Educacioun Naciounalo li souleto garanto de l’egalita d’acès di famiho à-n-aquel ensignamen » escriéu la Flarep dins soun plang.
 

 

Lo 15 septembre passat lo premier ministre Jean Castex, amé son ministre de l’Ensenhament Jean-Michel Blanquer et lei dos parlementaris que li an fa de prepausicions per mantenir l’ensenhament immersiu dei lengas regionalas Mrs Kerlogot e Euzet, èran en discutida telematica amé lei representants d’aquelei sistèmas : Oficis publics de lengas basca, catalana e occitana, la colectivitat de Corsega e la Region Bretanha amé sièis associacions sòcis d’Eskolim, que representan iskatolas, calandretas, eca.

 

Lo premier ministre a vòugut precisar qu’aqueu rescòntre (virtuau) èra ren qu’un començament e que d’autreis actors serián convidats ai següents. Lei dos parlementaris autors dau rapòrt an, elei, vòugut sotalinhar que l’ensenhament immersiu èra compatible amé la Constitucion -rementam que lo Consèu Constitucionau aviá denonciat que dins bressolas e autrei, lo fach que lo monde se parla en lenga minoritari fòra dei cors èra contrari a la Constitucion ! Aquò dich, per elei fau una “definicion adaptada de l’immersion”… “Aquò vòu dire que nos faudriá adaptar l’immersion a la definicion que ne’n donarián !” a comentat un associatiu.

 

Lei Oficis publics, de son costat, an contestat lo nombre d’escolans e, d’un biais generau, leis estatisticas oficialas per ce qu’es de l’ensenhament dei lengas minoritaris que veson coma “gonfles”. Dau costat d’Eskolim la tonalitat generala siguèt : “nos avètz tant atacats qu’ara avèm pus ges de confiança”

 

Aquò dich Jean Castex, pimat, a anonciat la creacion d’un organisme de concertacion sus lei lengas regionalas, que seriá dubert avans la fin dau mandat d’Emmanuel Macron. Seriá interministeriau e sota sa responsabilitat directa. Exit Jean-Michel Blanquer ? En tot cas èra la demanda generala associativa, aquò.

 

Autre nòva : una circularia es en preparacion, per confortar lo modèl tant deis escòlas associativas coma publicas en immersion, e tau coma exista … Aquò dich, Jean Castex se seriá ben retengut d’evocar la question de la lenga de comunicacion e l’aprendissatge dau francés en escòlas mairalas, segon nòstreis informators : justament lei ponchs qu’aviá decidit de censurar lo Consèu Constitucionau.

 

“Sembla que monsur Castex vòugue lançar la concertacion dau temps de la campanha presidenciala” nos ditz una observarèla de l’ensenhament bilingüe, “e per leis actors de l’ensenhament bilingüe o immersiu serà pas lo pièger moment per negociar d’avançadas...”

Lire aussi : Jean Castex devait dialoguer le 15 septembre avec les défenseurs de l’enseignement immersif