Sus l’ecran vaquí un vielh amb sa casqueta que nos parla gavòt coma plus degun lo parla benlèu. Racònta coma èra la societat quand tornèt dau servici militar. E se la lenga occitana se mescla de francés tre que lei mots li mancan, es que tota sa vida a parlat coma aquò.
 
Coma aqueu son a l’ora d’ara una quinzena que nos parlan, per mai que d’un delà de la mòrt, coma parlavan nòstrei rèires, un occitan que sembla qu’una lenga cosina per aquelei que l’an aprés a l’escòla.
 
Es justament una dei tòcas dau Cep d’Oc, amb son site web, presentat as Ais dimars 25 de setembre de 2013, que « de permetre au monde d’entendre la musicalitat de la lenga e de prendre consciéncia de la varietat fantastica de sei parlars, que nos donan 45 000 mots de provençau, quand lo francés ne’n prepausa que 15 000 ».

L’ancian productor de Vaquí, l’emission en lenga nòstra de France 3 Méditerranée, Jan Pèire Belmon, ara president dau Cep d'Oc, o ditz : « i aurà una vidèo de mai chasca setmana en linha ».
 
Serà prepausada amb son sotalinhatge en grafia classica, mistralenca e en francés. Lo tèxte podrà tanben èstre prepausat a despart.
 
Per aquò de formacions seràn organizadas amb aquelei que, benevòls, voudràn se passejar per Provença-Aups-Còsta d’Azur, per entrevistar davant una camèra fixa lo monde que parla, e subretot que parla en seguida d’una transmission familiala.

Lire aussi : Le Cep d’Oc prépare un système de collectage et de partage de l’oral occitan en Provence 

 
Lei vacanço d’estieu s’esperloungaran jusqu’au 16 de setèmbre pèr Vaqui, l’emissioun en lengo óucitano de France 3, avans que de leissa subran la plaço à-n-uno trasmissioun d’evenimen espourtiéu tre la semano seguènto. Aquélis auvàri au mens chanjaran pas…
 
Per lou rèsto, es lou chanjamen que marco aquelo rintrado. Premier, Jan Pèire Belmon, lou proudutour de Vaqui despièi 1994, es aro a la retirado.  Em’eu desaparèis de l’escran Liza, que presentavo Vaquí despièi quatre an. Liza a urousament toujour countunia soun obro d’artisto canteiris. Pamens countuniara de fa de repourtage per Vaqui.
 
Es dounc lou retour de Frederi Soulié que marcara la rintrado de Vaqui. Aquelo se debanara à Touloun, « ounte se parlara de gastrounoumìo » preciso l’ome que, d’annado, presentè à France 3 Provence « La cuisine d’à côté », uno emissioun qu’a couneissu un franc sucès. « Un jour ai agu la suspresso d’aprendre qu’èro sus uno cadeno culturalo dóu Brasil ! » se congousto l’animatour. Se vèi  tambèn à Madagascar.

Frederi Soulié es un ome de televisioun bèn couneissu au nostre ; avié deja presenta Vaqui fa dès an. Mai soun obro se ié redus pas. Avié tambèn presenta en francés « C’est mieux le matin », uno autro emissioun proun celebro de France 3 en regioun. E encaro « Talents », o « Bienvenue chez Fred » quant es pas lou courrespoundènt regiounau de « En direct chez vous », « que lou proudutour, Roland Boyer, me demando chasque jour de parla uno brigo prouvençau… ço que fau encaro quand me demandon de presenta l’evenimen lou mai impourtant de la petanco en Franço, lou « Mondial La Marseillaise ».
 
Aquel ome d’esperiènci à la televisioun regiounalo sara aro en meme tèms proudutour e presentatour de Vaqui. « Troubàvi Liza fouarço bèn dins aquéu role, mai la cadeno a decida». Sarié interessant de saupre lei critèri de France 3. Chausi un de sis emplegaire pulèu qu’un intervenènt dóu deforo que grèvo lou buget ?
 
A despart d’acò, se la chourmo de Vaqui chanjara pas, emé Magali Gazzano, Eliano Tourtet, Liza e d’àutri a l’óucasioun, lou chanjamen maje sara lou retour de l’emissioun lou dimenche de matin. Despièi dous an lei baile de la cadeno regiounalo l’avien plaça lou dissate, mau-grat forço countestacioun. « Ieu m’agrado mies lou dimenche, que lou mounde es mai dispounible ; lou dissate lei trouban pulèu à faire sei croumpo dins lei super-marcat ! »

Dins aquelo emissioun, que passara pèr miechouro à parti de vounge ouro manco un quart, la lengo franceso fara pas pòu à Frederi Soulié. « Se un l’emplego per parla bèn d’un CD o d’un libre en lengo d’o, perqué noun ? » Mai nous dis qu’aquelo poussibleta sara pas lou resultat d’un manco de loucutour prouvençau o aupen, e que, part acò, se podon trouba aro de jouine que parlon. « L’ai bèn vist quand siéu ana à l’estàgi de Prouvençau LengoVivo, mounte lei nistoun pendènt uno semano soun en imersioun. »
 
Lou proudutour de Vaqui parlo prouvençau despièi lou brès, que si gènt parlon la lengo à Pertus, ounte es nascu. « Siéu toumba dins l’oulo tout pichot ! ».
 
Esperen qu’aura proun l’óucasioun de la parla, la lengo, qu’entre evenimen naciounau e retrasmissioun espourtivo, l’escoumesso pèr Vaqui sara bèn de pas se fa rauba l’anteno trop souvènt. Deja, leva dóu 23 de setèmbre, lou 14 d’óutobre deura leissa plaço à-n-uno esprovo de VTT, e lou 28 dóu meme mes, sara la courso à pèd Marsiho-Cassis. Es lou pres pèr passa lou dimenche, de s’acipa ‘mé lou service d’esport de la cadena au nivèu eisagounau. E Vaqui, dins aquéli fretadis, sara chasque cop lou nanet contro lou gigant.