Li aviá agut quauqueis annadas amb mai de vint pòstes au capes d’occitan-lenga d’òc (denominacien oficiala dau ministèri de l’Educacien), chasque an, quora siguèt creat dins leis annadas 1990, la pòrta d’intrada s’es rebarrada tre 2004, annada que pas mai de quatre pòstes siguèron prepausats au concors.
Despuei aqueu nombre aviá jamai evoluit fins qu’a vuei, que lo ministèri a fa coneisser lo nombre per l’an que ven, ridicul : tres ! Segur lei conséquencias pòdon lei endevinar : mens d’escolans dau segondari podràn accedir an un cors de lenga regionala (la mesura pertòca totei lei lengas de França) ; e amé tant pauc de pòstes dubèrts au concors, lo signau mandat ais estudiants serà desastrós ; perqué s’endralhar dins la preparacion d’un concors onte aurètz tant pauc l’astre d’ensenhar puei ?….
De que ne'n pensa Olivier Pasquetti, lo president de la Felco, l'associacion dei professors d'occitan ?
Aquò d'Aquí – Tres pòstes, coneissem la responsa, mai seriá pron per assegurar la relèva ?
Olivier Pasquetti – Segur que non. Despuei quauqueis annadas una bòna part dei professor-as d’oc se’n anan a la retirada ; dos sus quinge en 2023 per ma sola Acadèmia de Niça. Fau vèire que la premiera classa de professors d’occitan, arribada dins leis annadas nonanta, èran mai que d’un còp de trabalhaires en reconversion ; aviam un autre mestier e fasián de cors associatius d’occitan. Avian pus vint ans, ara son retirats mai que d’un còp. Dins lo relarg que nos interessa lo potenciau d’escolans es de uech millions, e per li ensenhar l’occitan li a pas mai que 200 professors certificats, e a chapauc seràn retirats. Adonc es impossible de respondre a l’escomessa sensa un renovelament important.
AA – Vaquí una situacien pietosa, mai quid dei responsas possiblas ?
OP – Avem chausit de popularisar la question e de’n faire una question politica ; am’aquò avem escrich una letra per totei leis elegits, que siegan conselhiers despartamentaus, regionaus, deputats, premiers cònsols, per expausar la situacion e leis escomessas, e li demandar de faire resson. La tòca es de crear un movament generau de decidaires favorables a l’ensenhament de l’occitan, e en capacitat de mandar la demanda a l’Estat. La letra es sus lo site web de la Felco e chascun pòu se ne’n servir e escriure a seis elegits.