Per lei scientifics, lei rores , per exemple, nos pòdon entresenhar sus la capacitat dei bòscs d’espongar lo carbòne, que consúman quand créisson. Mai encara, lei fuèlhas que tómban a l’auton, puèi que s’amolónan au sòu, empàchan tambèn una briga la tèrra de relargar lo meme carbòne. Enfin, lei bèstias microscopicas que li vívon, élei se norrísson d’aqueu carbòne, lo mai important de nòstrei gas d’efèct de sèrra.
 
« Un deis enjuècs dei mesuras seriá de nos dire s’aquélei bòscs pòdon mai o mens compensar lo carbòne que s’espandisse deis usinas » ajusta Ives Noack.
 
Icos serà en França un « Fòrça Grand Instrument de Recerca » (TGIR), adonc am’ un pagament prioritari en 2015 e leis annadas puèi.

L’installacion provençala serà la tresena malha d’una ret francesa de mesuras, qu’es tambèn europea : Orleans e l’Auba n’en son leis autras dins l’exagòne. Mai en Euròpa li trobam pereu l’Universitat de Las Palmas ai Canarias, l’Universitat Tecnica de Lisbona, e aquela de Tuscia, en Etruria italiana.
 
La torre de Sant-Micheu, va fau dire tambèn, s’ajustarà a d’àutreis iniciativas que dévon mantenir aquel observatòri astronomic, prestigiós (es d’aquí que siguèt descubèrta, en 1995, la premièra exoplanèta), mai despassat per leis observatòris gigantàs d’America dau Sud.


Ecrit avec les suggestions lexicales de Reinat Toscano