Reactivada despuei 2010 la comission Lengas Regionalas de l’Associacion dei Regions de França s’acampa ambé regularitat. Lo darrier rescòntre entre sei sòcis s’es debanat a Marselha lo 9 de  janvier.
 
« Avèm parlat de l’abséncia totala dei lengas regionalas dins l’avant projèct de lèi Refondacion a l’Escòla » nos precisa David Grosclaude, lo president d’aquela comission. E l’ARF a mandat una letra au ministre de l’Educacion per s’en inquietar, « dau temps que les presidents dei Regions Aquitània e Bretanha, chascun de son costat, fasián parier ».
 
La Lèi territoriala que se discuta a l’ora d’ara, es un autre subjèct d’inquietud per eu. « Li trobam ren sus lei lengas regionalas , e volèm rescòntrar la menistra Marylise Lebranchu. » qu’ajusta.
 
Ambé Gustau Alirol, delegat a la Lenga Regionala dau Consèu Regionau d’Auvernha, Bernat Jaussaud, aqueu de Provença Aups e Còsta d’Azur que recebèt sei collègas per aquel acamp, Lea Louarn tot parier per lo Consèu Regionau de Bretanha, e  d’encargats de mission de Ròse Aups, la discussion a tanben portat sus lei projècts audiòvisuaus.

S’agiriá de crear una filiala de Brezhoweb, una web TV, que podriá dins l’espaci occitan crompar de contenguts e lei tradurre. « Mai trabalham tanben per vèire coma mutualisar d’otís, coma per exemple d’ajudas per la produccion TV, » pènsa Bernat Jaussaud. David Grosclaude parla d’un budgèt necessari de 400 000 €/an per un projèct de web TV en lenga occitana.
 
L’ARF assaja de jugar la proximitat ambé leis instàncias gouvernamentalas, e de prepausar lo gaubi dei Regions. Se Provença es la soleta Region occitana qu’alestisse pas encara son Ofici de la Lenga, leis autrei, occitanas o bretona, pòdon prepausar una ajuda au ministèri de l’Educacion. « Ambé sa competéncia  e son gaubi, leis Oficis pòdon discutar ambé lei gents dei ministèris, e faràn avançar lei projècts » que nos ditz Lea Louarn.  L’ARF que s’acampa en generau a París, a mai aisadament sei intradas dins lei ministèris.
 
Espèra per exemple trabalhar ambé la SNCF per una politica d’anóncias en lengas regionalas. La Bretanha veira d’alhors totara sei garas parlar breton, en mai dau francés.

Tre lo mes de janvier de «  gropes de travalh » devon examinar lei despensas de la Region per « n’en sortir tot çò qu’es pas de gaucha » en 2014 segon Michèu Vauzelle. Lei comunistas en particulier, ‘mé lo Frònt de Gaucha, vòlon que s’arrèste lo subvencionament d’activitats associativas que díson « religiosas ». 

Lo president Michèu Vauzelle, a rapelat, lo 14 de decembre, quand fuguèt votat lo budget 2013, que de despensas « pòdon pas èstre comprimidas : lo contracte entre la Region e la SNCF n’en fan partida, coma la politica d’aprendissatge, subretot au moment de la crisi, o lo pagament dei salaris de cinc milas agents de licèus, que siégon ensenhaires o non ».

D’elegits ecologistas nos an dich, d’un biais non oficiau, que saran leis ajudas associativas, que n’en patiran tre 2014. De vèire se pertocarà vertadierament tot lo malhum associatiu o se li aurà una politica endraiada amé de règlas.

« La reduccion sarié de dètz dau cent, mai tocarié pas tot lo monde », apóndon nòstrei contactes. Çò que sembla segur es que 2013 serà una mena de batuda per cochar leis associacions tròup pagadas sensa tòca sociala.

Lo budget regionau, qu’es au nivèu de quasi 2 miliards d’€uròs, a vist per 2013 una despensa que creisse de mai de 2 % alora que lei dotacions de l’Estat van demenir. Segur la Region va lançar un emprunt populari per agantar trenta milions d’€uròs, que serà jamai qu’una gota dins la mar.