Uno trentenado de santoun de 30 cm soun esta crea pèr lou Paire Miquèu Cicculo e mes en scèno pèr Jan-Vitour Moureau, dins un decor qu'aqueste a dedica à Mistrau.
 
Countestualisa dins lou vilage de Maiano, lou belèn es istala dins la capello dóu Roure, ounte demoro lou cor de Baroncelli.
 
Tre qu'es rendu publi, vèi passa famiho, adulte de tóutis age. Esviho un interès toujour mai grand, e ço mau-grat la dimensioun primitivo d'aquéu tros d'istòri biblico. 

Dintre li noumbrous vesitaire dóu Roure, Laurens Carletti, paire de famiho. Pèr éu, es l'escasenço de «vèire ço que pòu èstre fa e ço que pòu èstre mes en valour». Pamèns , es lou proumié cop que vèn mira lou belèn dóu Roure.
 
«Li belèn prouvençau an un pichot quaucarèn en mai, qu'an pas lis àutri belèn» jugo lou vesitaire qu'es tambèn atour culturau.
 
D'efèt, segound éu, aquelo especificita es degudo au «liò, qu'es lou pretèste pèr moustra tambèn touto la vido di vilage prouvençau».
 
Mai que mai, ço que i’agrado forço es «l'estetico poupulàri» que resulto di belèn.
 
Adounc se pòu pensa qu'es la bèuta dóu belèn que pivelo lou mai lou publi. Mai aquéu bèu belèn sarié à l'encop au cor di tradicioun de Franço e un enjò pèr la laïcita.
 
«La neissènço d'un enfant paure provo uno universalita : lou fa de se l'aproupria ansin es quicon de famihié pèr li gènt» fai remarca Laurens. Touto-fes, mau-grat sa counfessioun religiouso, Laurens es «perfetamen estaca à la laïcita, qu'es un gage dóu viéure-ensèm vertadié». 

Despièi lou 8 de decèmbre, Jan-Vitour Moureau raconto i vesitaire li secret dóu belèn prouvençau. Ço que manco pas de nous estouna, es de vèire «un Jóusè en gardian e uno Marìo en Mirèio», fantasié que se trobo souncamen dins aquéu belèn mistralen.
 
«Quouro fau de belèn, assaje de li metre en scèno pèr li rèndre viéu, aqui arribon, soun atriva pèr quaucarèn» especifico lou benevòu, ancian salaria dóu Roure.
 
«Au Palais dóu Roure, avèn pres la coustumo de counvida e imagina un tèmo en raport emé l'estile dóu santoun», que preciso.
 
La proufusioun de persounage, «ispira di «pastouralo», fa lou belèn prouvençau. S'amo lis ana vèire pèr ço qu' «en Prouvènço es impourtant, e i a la bèuta dóu santoun».
 
Segound Jan-Vitour, «lou belèn es religious, mai après acò pòu èstre un pau proufane, emé l'arribado de l'enfant Jèsu en Prouvènço»...
 

Segur qu'aquelo aproupriacioun prouvençalo nous parèis naturalo !

Pamèns, «se fau pas faire que que siegue...» aviso lou benevòu. Que fau pas oublida que «Jèsu arribo souncamen dins la niue dóu 24 au 25, e qu'en genié s'i pauso li rèis mages, qu'avançèn pau à cha pau». Uno rigour que fai lou charme dóu belèn.
 
En brèu, dins aqueste countèste particulié que l'identita dóu belèn es raubado à de fin poulitico, li gènt, éli, sabon perqué van mira de belèn e perqué es un simbèu carga de valour universalo.
 
Lou belèn es pas souncamen lou crestianisme : es ço qu'unifico, raprocho, acampo davans la bèuta de l'art e de la pensado. 

Palais du Roure – 3 rue Collège du Roure – 84000 Avignon
04 90 80 80 88
Jours d’ouverture : du mardi au samedi, sauf jours fériés.
Horaires :
14h-18h (Une crèche mistralienne et table calendale)
10h-13h/14h-18h (Exposition Grand format : le Rhône de Villeneuve)
Jusqu'au 9 janvier
Article écrit en provençal rhodanien, graphie mistralienne, avec les suggestions lexicales d'Alain Barthélemy.

Se trato d'un oubrage couleitiéu en resson à la mostro dóu Roure counsacrado au Mèstre en 2014.

Coumpausa de sèt partido, ''Présence de Mistral'' acampo d'idèio, d'istòri, d'indice e d'ipoutèsi sus li relacioun de Mistral au sèn dóu Palais dóu Roure. «Voulian èstre presènt pèr lou centenàri mistralen» anóuncio Sylvestre Clap, counservatour au Roure.

E mai particulieramen, acòs legitime, lou libre souto-ligno tóuti li liame qu'eisiston entre Mistral e lou païs d'Avignoun.

Un proumié eisèmple, lou sèti dóu journau L'Aiòli que se tenié eici au Roure... ''Présence de Mistral'' fuguè escri emé la voulounta de «reativa li liame entre Avignoun e la memòri prouvençalo» apound lou couservatour.
 

Dins aqueste libre fasèn un retour sus la fourmacioun dóu felibrige, li courrespoundènci diverso e parladisso sus li pensado de Mistral,

De Flandresy e Baroncelli. Aquésti formon un triò atipi que countribui incounstablamen à l'identita e la founcioun dóu Palais dóu Roure.

«Aqueste libre servis de remembra à-n-aquéli que penson qu'Avignoun noun es que lou festenau o la couleicioun Lambert» fai remarca Sylvestre Clap.

Lou counservatour souveto d'efèt «faire renàisse lou liame entre lou passsa e lis enjò d'un desvouloupamen culturau armounious, ounte devon couabita mai d'uno tendènci». ''

Présence de Mistral'' es un oubrage founda sus d'archiéu pivelant (foutò, citacioun, aneidoto, elemen de biougrafìo...) seguènt de percous ja proun estudia.

«Duerb de pisto d'un vertadier corpus di manescri de Mistral» supauso Moussu Clap. Acampo subretout lou principau de counèisse sus lou Mèstre, lou felibrige e la vido avignounenco de soun tèms.

Dins sa prefàci, Sylvestre Clap s'interrogo sus «uno identita prouvençalo en marrit esta (...), l'especificitat loucalo sèmblo s'èstre pau a cha pau escafado».

Pèr aquéli paraulo, pouncho uno proublematico à l'encop soucialo, culturalo e poulitico.

«Quet sara deman, lou role dóu Palais dóu Roure, simple e riche counservatòri d'un patrimòni de preserva ?» se demando encaro lou counservatour.

Un patrimòni que retrouban particulieramen dins un libre forço doucumenta, armounisa dins sa retourico.

Mai qu'un oubrage de tipe universitàri, es un bèu-libre que lou titre, ''Présence de Mistral'', significo la marco, l'emprinto, la piado, lou passage, la remembranço que caraterison uno evidènci.

Mistral fuguè lou vènt qu'escoubè Avignoun d'un boufe nòu, lou d'uno Renaissènço prouvençalo de grando impourtanço. E aqueste libre es aqui per lou testimounia. 

Présence de Mistral, collectif. Ed. Les amis du Roure - coll. Les hommages du Palais. 180 p. ill. 20€. Pour commander : alain.layrisse@wanadoo.fr et 04 90 80 80 87.

De legi tambèn : Lou Palais dóu Roure se tèn fièr fàci au tèms

Lou cor de Folco de Baroncelli demoro literalamen au Palais dóu Roure despièi sa mort en 1943. Es Jano de Flandresy, que lou Marqués rescountrè en 1908 sus lou roudage de « Mireille », que l'incito de li leissa soun cor au Roure.

Patrimòni avignounen vertadié, es sauva de la rouino pèr Jano de Flandresy. Croumpo l'oustau en 1918, ajudado pèr la fourtuno de soun paire.

E pièi « durant la segoundo guerro, decido de douna lou Palais dóu Roure e sa couleicioun à la vilo d'Avignoun, en escàmbi d'un travai de counservatris » esplico Mirèio Bosqui, archivisto de l'oustau  de 1971 à 1991.

       Li Baroncelli abandounon l'oustau familiau que s'en poudien plus óucupa.

La croumpado en 1918 signo la debuto d'un long devouamen de Jano de Flandresy au bastimen vièi, que se chanjo en musèu de la latinita.
 
 Jano tasto à la culturo d'O en debuto dóu sègle XXen, pèr un rescontre ‘mé lou Mèstre. Souto sa gestioun, lou liò reculis ço qu’adus lou Felibrige à la Renaissènço d'O.

« Es incredible ço que i a coumo archiéu au Roure  » penso Mirèio Bosqui quouro descuerb l'oustau.
     

Couneigudo souto lou noum de Farfantello, Enrieto Dibon perseguis lou travai de Flandresy après sa mort en 1959.

Pièi, emé l'iniciativo de Silvan Gagnière, lou counservatour sucessour de Jano, « s'i óutèn de credit pèr restaura lou bastimen » se remèmbro Mirèio Bosqui.

De proumièri mesuro de sauvo-gàrdi que se renouvellon despièi 2013 em' « uno restauracioun esteriouro e d'àutri chantié coumo l'inventàri, l'enfourmatisacioun, l'aplicacioun di poulitico editourialo e de mediacioun » afirmo Louis Millet, ajoun au counservatour atuau.
 
Pamens, lou van pòu èstre limita pèr « lis alea bugetàri » qu'óubligon à-n-uno restauracioun « minimalo ».

Lou Palais, éu, escound sèmpre de secrèt : « i a un grand poutenciau qu'es pancaro esta esplecha » estimo l'ajoun.

          Vuei, pas mens de nòu founcioun soun atribuido is salaria de l'oustau. Segoun lou counservatour atuau Silvan Clap, « lou Palais es l'espressioun memo de nosto ciéuta, pèr sis óurigino italiano, la famiho Baroncelli, la Renaissènço prouvençalo e Jano de Flandresy ».

Es dins aquelo perspeitivo que s'estaco à « prouvouca uno curiousita nouvello dintre lou publi » à travès un mounumen « depousitàri de l'amo prouvençalo ». 
   

Lou Palais dóu Roure est tambèn liga à l'entoumoulougisto Jan-Enri Fabre. Dono de Flandresy « lou rescountro de soun vivènt e reculis de doucumentacioun sus éu » racounto Louis Millet.

E d'apoundre « proudusis mai d'un article o de pichots estùdi sus Fabre ». Evoco li « courrespoundènci entre Jano e la famiho Fabre ».
 
Aquel interès pèr l'entoumoulougisto justifico lis acioun dóu Palais pèr lou centenàri de la mort de Jan-Enri Fabre.

« Lou Roure participo à la celebracioun d'aquelo figuro óuriginalo souto soun angle prouvençau » counclus l'ajoun au counservatour.

Uno proumiero evoucacioun durant la Niue di musèu lou 16 de mai deboucara sus d'àutris acioun à l'entour de Fabre. De segui...
 

 
Oustalet de Baroncelli-Javon
3 carrièro Collège-du-Roure
Tel. : 04 90 80 80 88
Ouràri : Vesito menado dóu dimar au dissate à 11 ouro : intrado paganto (de 2,30 à 4,60 euro)
Vesito liéuro dóu dimar au dissate, de 10 o à 1 o e de 2 o à 6 o : intrado à gratis.
Biblioutèco duberto dóu dilun au divèndre de 9 o à 12 o e de 2 o à 5 o. Barrado en avoust.