Ero clar, lou publi de la Librejado, dimenche 3 de mars 2013. Ourganisado à Marsiho, au quartié de Castèu Goumbert, pèr lou Felibrige, aquelo manifestacioun èro counsacrado à l’escri d’O. Se ié rescountravo mai que d’un autour,  e si libre, que fuguèsson escri en grafìo mistralenco o en grafìo classico.
 
Mau-grat aquel esperit lar, lou mounde ié venguè pas proun noumbrous. « Lou mounde d’aro, particularamen li jouine, legisson pas tant qu’acò, e s’atrobo pas eisadamen un publi » regrèto Bernat Gièly, que publico emé lis edicioun Prouvènço d’Aro.
 
« Mai que d’un cop, lou libre atrivo de mounde dins l’encastre d’uno manifestacioun que n’en parlo pas… coume un festivau de musico óucitano » soutaligno de soun coustat Liso Gros, que venié fa un repourtage televisuau pèr la TV Sud.

Lis ourganisatour avien pas chausi aquest an de fa de councert, pèr justamen se douna lou tèms e l’espàci dóu debat : n’avié un de matin e un autre d’après dina, uno taulo redouno sus l’ispiracioun ruralo o urbano dis autour en lengo nosto, l’autro sus la creacioun literàri pèr li loucutour d’uei.
 
Lou capoulié Jaque Mouttet a regreta que la manifestacioun fuguèsse pas adoubado pèr Marsiho Prouvenço 2013. « Fa pas plaço à la lengo d’O » qu’a proutesta, à l’adreisso d’un evenimen que brasso de milioun d’€urò. Uno critico represso per lou counseié regiounau Ervei Guerrera, counvida à  dire quàuqui paraulo.
 
Acuhido pèr lou Musèu Prouvençau de Castèu Goumbert, la Librejado èro, segur, foro de la vilo urbano ounte passo la foulo. Belèu que l’an que vèn, émé l’esperiènci, e d’ajudo publico, aquelo manifestacioun necito troubara lou mejan d’atriva tant de mounde coume lou meritarié.

Article écrit en graphie mistralienne, en provençal rhodanien, avec les suggestions d'Alain Barthélémy

Aquéu segound rescontre de Librejado, se debanara, lou dimenche 3 de mars 2013, au Cèntre de culturo prouvençalo Daniel Audry, 45 balouard Barra à Castèu-Goumbert (Marsiho), duberturo de 10 ouro à 12 ouro 30 e de 14 ouro à 17 ouro.

Uno proumiero taulo redouno, sus lou tèmo « urbanita, ruralita : es-ti que nosto lengo s’encapo em’uno meno d’ispiracioun ? » se tendra entre 10 e 11 ouro. A 11 ouro 30 : acuei dis autourita, aloucucioun e aperitiéu.

Uno segoundo taulo redouno, sus lou tèmo « qunto creacioun literàri pèr li loucutour d’aro ? » se tendra entre 15 e 16 ouro.
 
La Librejado à Castèu-Goumbert es un biais de s’entrauca dins Marsiho Capitalo éuroupenco de la Culturo qu’ignoro quasimen tout de la culturo nostro. 

publié en graphie mistralienne directement à partir du communiqué de presse