Pas encaro un an que lou gouvèr a defendu i soucieta coume European Gas Limited à  Gardano, de cava lou sòu per assaja de coumprendre s’es la peno d’esplecha uno jasso de gas de chiste. E pamens, vaqui que la « Coumissioun de segui e d’evaluacioun de teinico  d’esplouracioun e d’esplecho d’idroucarbure liquide e gasous  » vèn tout bèu just d’èstre creada per un decrèt d’Estat lou 22 de mars.
 
Es un paradosse que fuguèsse estado previsto per la lèi que defènde despièi lou mes de juiet passa la teinico de la roumpeduro idroulico.  Saran 21 persounalita : deputa, senatour, conse, counseia generau e regiounau…e douge que saran noumado pèr lou Menistèri di Mino e de l’Endustrìo per tres an, un cop passado l’eleicioun presidencialo.
 
Deja un raport intermenisteriau devrié nous arriba bèn lèu. Fuguè coumanda en febrié 2011. Sabèn deja que fara pas plasé is ecoulougisto, que coumenço pèr dire : « sarié daumage pèr l’ecounoumìo naciounalo e l’emplé, que noste païs vaguèsse enjusqu’à se priva… d’evalua d’un biais founs sa richesso poutencialo … es indispensable de fa lou travai de recerco ‘mé d’assai d’esplouracioun ».
 
Segur que s’apielon sus l’esperiènci dis Estats-Uni, ounte un milioun de pous fuguèron virouna, ounte, dison, i aurié pas agu de terro-trèmo pèr aquelo rasoun. Enfin, es pas bèn segur… D’un autro las, tóuti an pouscu vèire d’emissioun TV ounte, dins Òuklaouma, di roubinet sort plus d’aigo, mai de gas…
 

Deja lou raport dis que dins lou Sud de Franço, uno estùdi idrougeoulougico es envisajado pèr fa un bilans de la ressourço utilisablo, e la vulnerabilita au segound semestro de 2012. I avié mai que d’un proujèt, dins la Valado dóu Rose e à Gardano. Es espantant de legi que, per acò, prepauson d’utilisa per la roumpeduro idroulico, d’aigo noun poutablo dóu Bassin Parisen !
 
E la missioun intermenisterialo s’arrèsto pas aqui, que prepauso tambèn d’euroupeanisa l’afaire, per se douna de mejan « de basti un socle d’espert euroupen, estènt que la Franço dispauso d’uno coumpetènci recouneissudo ». Volon atraire lis espert poulounés que van se fourma avuei eis Estats-Uni…
 
Segur qu’es bèn mau-eisa de pensa que darrié aquéli precounisacioun i ague pas la man di soucieta qu’esplechon de gas de chiste. Semblo pamens que sarié poulido la garroto per lei soucieta que fan mestié de cerca aquéli gas de chiste ; dison que la reserva poudrié prouvesi aperaqui vint dóu cent de l’abenage de gas en Franço per un mouloun d’annado. Per éli vau la pena d’avança d’acatoun, escoundu darrié uno coumessioun de saberu que mai o mens, diran tóuti la mumo causo.

Emé lei Cèntre d’Ensignamen de-countùni de la Lengo Regiounalo, es poussible d’aprene la lengo nosto au nosto ! Aquélis escolo meirenalo e primàri soun vint-e-cinq à l’ouro d’aro dins li Bouco-dóu-Rose, tóuti dins l’ensignamen publi.

Soun amiro es d’aprene is escoulan tant la lengo nostro coume d’ensigna en lengo nostro gràci a d’ensignaire assabenta. Valènt-a-dire que quàuquis ouro cado semano, li mèstre d’escolo, fourma au prouvençau, fan de matematico o de geougrafio en lengo is enfant.

Li mèstre soun fourma per acò dóu tèms de sis estùdi. Pèr lou rèsto, lou corpus d’ensignamen dis escoulan es lou meme que pèr lis autre. Un cop l’an, soun avalourado aquélis escolo, e pèr l’annado 2009-10, l’avalouramen dis que vuechanto dóu cent dis escoulan pertouca an lou voucabulàri de baso, e que sabon descriéure en lengo.

Perqué ensigna lou prouvençau à l’escolo coumunalo ? Pèr garda o douna uno identita, segur, mai autambèn perqué« l’ensignamen de la lengo regiounalo es au service dóu mestrige de la lengo franceso » escrivon lis ispeitour d’Acadèmi sus soun site internet.

E, se pòu dire tambèn que la lengo d’o es uno poulido passarello pèr aprendre lis àutri lengo roumano. Fau dire qu’aco marcho, que lo niveu evalua fa veire que mai que d’un escoulan pòu utilisa la lengo nosto dins l’encastre de sis activita de la journado.

Un pantaï pèr leis ensignaire d’anglés... Se parlo aro de duerbi d’autri Centre de-contùni : l’escolo Elsa Triolet de Gardano pèr exèmple, e dejà l'an fa passa uno dau Martegue, Enric Damofli, en escolo bilingua l’an passat.