Malva au benèstre dei budèus coma de la gola

Michel Neumuller — Thu, 06 Jun 2019 09:50:00 +0200

La mauve est très commune, profitez-en ! Plante adoucissante par excellence, elle peut aussi servir de légumes.

La malva es una planta fòrça comuna, que florís quitament la prima tota, e una bona part de l'estiu, abans que faga tròp sec. Trobam mai d'una mena : Malva sylvestris, Malva neglecta, … e dins los òrts semenam la malva de Mauritania. Totas s'emplegan parrièr, i a pas que lo temps de culhida que pòt èsser mai long, segon que la flor es mai granda o mai pichona.

Lo principi quimic màger de la malva son los mucilages. Es una substància que fa una mena de gelarèia quora es mesclada amb d'aiga. Es una planta que va adocir, amaisar, e que se farà per exemple en tisana de flors contra lo mal de garganta (tracheïta), o en cas de constipacion per ajudar lo transit.

E mai las fuèlhas se pòdon emplegar. En tisana, amb las flors, e tanben en cosina. Al Sud de Miègterranèa, se'n servisson coma d'espinarcs, o per ligar la sauça del tajin. La podètz mesclar a las èrbas pel fricandèu, per la calheta, en borbolhada amb d'uòus.

Benvenguda Chicorèia

Florence Faure-Brac — Tue, 08 Jan 2019 16:30:00 +0100

Elle peut faire partie de nos salades, mais son action sur le foie, les reins, la peau et contre la fièvre la mettent au rang de pharmacie du bord des chemins.

Tot l'estiu, la chicorèia, o cicòri, vestís de blu camins e rotas. Amb son pè regde e grafic, e sa color paradisiaca, es indefugibla. Son nom latin es Cichorium intybus. En tisana emplegarèm sas flors, mas tanben sa rasiga per netetjar lo fètge e los rens, e fa baissar la fèbre. Serà benvenguda en cas de reumatisme e de dermatòsi. Amb la rasiga torrada se fa una bevenda ben coneguda, que foguèt utilisada per remplaçar lo cafè.

Una salada amara

A la prima, los amators d'ensalada champanèla culhisson la chicorèia demest d'autras erbas feras. Sas fuèlhas pòdon aver de siloetas fòrça desparièras : un còp retipan las fuèlhas de pissalièch, un còp semblan las fuèlhas d'arrucat, cal aver l'uèlh aluserpit per la reconéisser en roseta. Fa partida de las ensaladas mai amaras : per aqueles que son pas acostumats, tant valdría la mesclar amb d'ensaladas doças, coma la rosela o lo lachasson.

En elixir floral

Coneissètz las Flors del Dr Bach ? Son 38 elixirs florals obtenguts per solarisacion de flors pausadas sus d'aiga de sorga pendent quatre oras. S'i apond puèi de conhac o d'armanhac per la conservacion. Permeton d'equilibrar d'estats emocionals o psicologics empachadisses : dòl, colèra, paur, culpabilitat... L'elixir de chicorèia permet d'ajudar aqueles que donan soncament en esperant quicòm en retorn, a aimar e donar sens esperar.

Aquò d'Aqui

Malva au benèstre dei budèus coma de la gola

Benvenguda Chicorèia