Eugène Caselli, lo president de la Comunautat Urbana de Marselha Provença Metropòli serà lo premier òme politique pèr s’endraiar francament dins la batalha municipala de la premiera ciutat d’Occitania.
 
« Ai decidit de menar lo combat còntra lo FN dins lei 13 e 14ens arrondissaments, perqué es dau dever d’un candidat au municipi de Marselha de crosar lo ferre ont es lo dangier » que publica sus son blòg despuei dissabte 24 d’avost 2013.
 
Lo 22 d’abriu 2012, au premier torn d’aquela eleccien, l’ « onda blu marina » aviá premier pertocat lei 10 e 11ens arrondissaments de Marselha, amé 27,20% e 27,23%.
 
Es de quartiers monte s’entrecavaucan usinas abandonadas e ostalets bastits entre de vièlhs quartiers coma Sant-Lop o Sant-Menet, que siguèron encara de campanhas avans leis annadas seissanta dau siècle XX, e monte metrò e tramway arriban pas encara.
 
Leis arrondissaments monte vòu se batre Eugène Caselli an pereu vist la creissènça fòrta dau FN, qu’aviá fach 26,13% dins lo 13en, e 23,38% dins lo 14en.
 
Mai au segond torn, e dins lei dos arrondissaments, siguèt François Hollande que ganhèt : de mai de 60% dins lo 14en, e de 51% dins lo 13en.
 
Lei autres quartiers Nòrd avián tanben viscut una auçada franca dau FN au premier torn : lo 15en  amé 24,04% e lo 16en amé 25,79%
 
D’un biais generau, lo FN aviá reculhit 21,22% dei vòtz a Marselha lo 22 d’abriu 2012.

Eugène Caselli, eu, aviá ganhat l’eleccien intèrna a la Comunautat Urbana en 2008 còntra lo candidat gaullista Renaud Muselier, qu’aviá pas fach lo plen de vòtz d’elegits de drecha, un camp divisat que lei elegits fòra Marselha reprochavan a Jean-Claude Gaudin, lo premier cònsol, son autoritarisme. 

Eugène Caselli èra alòr premier segretari de la Federacien dau PS dins lei Bocas-dau-Ròse. Era an aqueu moment elegit d’opausicien de la comuna de Marselha despuei quauquei setmanas pas mai.
 
Au mes de janvier 2013, s’èra déjà desclarat candidat au municipi de Marselha en 2014. Sei concurrents màgers socialistas son lo deputat Patrick Mennucci e la menistra e conselhiera generala Marie-Arlette Carlotti, totei candidats a la candidatura.

« Fai trenta ans que lei Marselhés dison que seriá una bòna idèa, e nos a pas faugut cinc ans per l’endraiar » que ditz Karim Zéribi. Lo president de la Regia dei Transpòrts de Marselha e lo president de Marselha Provença Metropòli, Eugène Caselli, de cotria diluns 26 d’avost, an anonciat que l’experiénçia de doas navetas maritimas, de bus de la mar, seriá perseguida.
 
MPM es l’autoritat  organisatriça, aquela que paga lei transpòrts, e per l’annada monte Marselha es capitala europenca de la cultura, aviá vòugut prepausar doas navetas maritimas.
 
E se siguèron dubertas per lei toristas, en veritat la reüssida èra premier l’afogament dau public locau.
 
Lo batèu transpòrta lei viatjaires dau Pòrt Vièlh a la Poncha Roja, au sud de la ciutat despuei mars 2012. A la mitat de setembre de la mema annada aviá enregistrat 262 285 intradas.
 
Puei una naveta siguèt endraiada entre lo Pòrt Vièlh e l’Estaca, monte dejà 200 000 personas son anadas per mar entre lo 13 d’abriu 2013 e lo 20 d’avost de la mema annada.

« Nos a fach 2000 per jorn en mejana l’estiu, e s’èra prevista per un assai entre abriu e la mitat d’octòbre, pòdi dejà vos dire qu’aquò serà perseguit » a anonciat Eugène Caselli, que lo farà marcar dins lo budgèt 2014. Lo mercat passat amé de societats privadas per assegurar aquelei navetas aurà costat 3,8 M€.
 
« Si trata de redusir la rompedura territoriala entre lei Marselhés » a ajustat Karim Zéribi. « Pas de ne’n faire mens per aquelei que vivon au Sud, mai ben de raprochar leis abitants dau Nòrd de sa vila ».
 
E d’ajustar : «  se l’aviam fach li a de temps, Marselha seriá a l’ora d’ara una ciutat-monde referenta en Mediteranèia ».
 
Lei « bus de mar » son pas tant excepcionaus. De Tolon a La Seina, dins Var, lo « Malhum Mistrau » de l’Aglomeracien tolonenca ne’n prepausa tota la jornada, que fau simplament pagar amé dos tiquets de bus. Son rapides e segurs.

A Marselha, fau aperaquí 40 mn per anar dau Lacidon a l’Estaca. E se lei viatjaires pagon 3€ per lo trach, leis abonats de la RTM, elei, pagon ren de mai. Es un avantage per lei Marselhés. Representon 54% dei viatjaires, e 32% son d’abitants dei XV-XVIens arrondissaments, aquelei de l’Estaca.
 
Pasmens, es pas una prioritat d’alarguir aqueu servici, maugrat que la màger part dau temps, li a de gents que restan au cai, tant li a de monde per viatjar coma aquò.
 
« La prioritat rèsta d’esperlongar lo tramway au Nòrd e a l’Est » que dison lei dos responsables.
 
Fau se rementar qu’en 1997, quand lo projèct de tramway marselhés siguèt vertadierament lançat, lo premier cònsol de Marselha, Jean-Claude Gaudin, aviá chausit de l’arrestar a la Jolieta, lo quartier monte èra prevista una operacien nacionala d’agençament, Euromediterranèa. Lo Nòrd, mai populari, siguèt escafat de la carta marselhesa dei transpòrts rapides. Es per aquò que se parla de « rompedura territoriala ».
 
E fau pas oblidar nimai que siam intrats en campanha electorala per lo municipi de Marselha. Eugène Caselli ven de si li lançar, per lo PS, se passa la primària. E Karim Zéribi, eu, se presentarà per EELV dins lo meme sector que lo president de MPM.