Vaquí 132 panèus fòtovoltaïcs, pausats sus un encastre que s’apiela d’un costat e de l’autre dau Canau de Provença, a Rians.
 
Tot alentorn, lo damier dei tèrras a facturar , jaune e vèrd, amé sei regas d’un vèrd prefond, que màrcon lei ribas enaubradas dei rius. Aquélei tèrras, li aurà degun productor d’electricitat per lei desrabar, coma l’an fach a La Barben (13), fa dos ans, amé de centena d’ectaras de garrigas plenas de biodiversitat.
 
La Societat dau Canau de Provença amé lo CEA, dins lo quadre de la Ciutat deis Energias, experimenta aquí tota mena de materiaus fòtovoltaics, que s’agís de refrescar am’aquela aiga. L’operacien li díson Canalsol.
 
« Refrescats, son rendement seràn melhor, va sabèm » nos ditz Bruno Vergobbi, lo director de la SCP. « E s’aquò marcha, dins un an, podrém prepausar tecnicas e materiaus a nòstrei partenaris a l’entorn de la Mediterranea. »

Deman, lei canaus agricòlas de Provença, dau Marròc o de Tunisia se podrián cubrir de panèus negres, que respectaran lei tèrras agricòlas e provesiran lo monde en electricitat renovelabla. Vaquí l’enjuec.
 
Tres societats an testat sei panèus a Rians. L’una es marselhesa, Dual Sun, e presenta una noveutat dei bèlas, que sei panèus son soples. Ideau per cubrir d’un biais leugier de kms de canaus. E una autra societat provençala, Optimum Tracker, assaja un procediment d’acompanhament de la corsa dau soleu.
 
Refrescats per leis uns dessobre, per leis autres dessota, per lei tresens amé la sola frescor passiva de l’aiga que raja sota aquela teulissa, lei panèus prodúson l’electrictat e son rendement es carculat.
 
« Sabèm dejà qu’amé un km lineari, la produccien d’electricitat seriá d’1,8 GWh l’an » nos ditz Joan-Luc Martin, dau CEA. EDF lei crompariá per 130 000 €, « mai nos fau saupre s’es interessant, pron rendable, que segur li aurà un cost d’investiment, puei d’esplecha » qu’ajusta, fisançós .


Dejà la SCP produse d’electricitat amé lei turbinas de sièis micrò-centralas sus sei canaus, e son director l’afirma : « tot ce que mescla l’aiga e lo soleu per faire d’energia nos regarda ».
 
Lei resultats de l’experiença son prevists per la fin de 2015. Puei serà temps de quichar l’interruptor.
 

Maugrat que lei subvencions d’Estat se sián arrestadas en 2011, l’industria fotovoltaïca contunha de cobrir lo territòri de sei panèus e de fornir d’electricitat. E mai, sembla qu’aquel assaniment dau mercat afavorize finalament lei entrepresas que vòlon durar, e qu’òbran au nòstre.
 
« L’Union Europèa trenquèt a l’estiu de 2013. Per ela faliá acabar amb lei politicas de dumping », que leis ajudas finançavan premier l’importacion de panèus chinés e lei bèus marges de societats que se lançavan dins lo solar unicament per aquò.
 
Çò qu’espanta es qu’aqueu discors nos ven d’un industriau dau sector, Arnaud Mine, rescontrat a Gardana a la fin de genoier. L’i èra vengut per inaugurar un pargue fotovoltaïc sus la còla dei Sauvaires.
 
Nos fa nòu ectaras de panèus negres dins un territòri grand coma una vintena de terrens de fotbòl, sus un ancian crassier de terrilhas dei minas de Gardana. Aqueu pargue serà bailejat per la societat dau ben nomat Arnaud Mine, Urbasolar. Pròcha de Montpelhier, a ren de veire amb la multinacionala espanhòla Urbaser, que precisa aqueu pionier de l’industria fotovoltaïca.

« Aqueu site d’una poténcia de 9,3 MW rendrà 12 000 MW per an, que faràn aperaquí 40% de la consomacion de Gardana », ajusta A. Mine. E nòstra tòca es justament de raprochar lo luec de produccion d’aqueu de consomacion ». En veritat, l’electricitat aprovesirà lo malhum generau de linhas electricas.
 
La societat qu’emplega setanta salariats, engenhaires e tecnicians, desvolopa a l’ora d’ara una chifra d’afaires de 50 milions d’èuros. E s’òbra premier en França, s’enebís pas d’anar furnar au Marròc e en Argeria onte candidata a d’apèus d’ofèrtas. Tot parier au Cazacstan, onte arriba amb d’autreis entrepresas francesas dau solar.
 
« Segur qu’es possible de crear una filiera fotovoltaïca francesa », qu’acèrta l’industriau. Òbra dins lo sector despuei un quart de sègle, e a laissat lei grands gropes per crear sa societat pròpria. « E o provam, bòrd que siam en ligason amb Silla, un productor de panèus dau Gard. »

Amb son partenari, Urbasolar assaja a l’ora d’ara de crompar l’usina Bosch de Venissieux, onte 250 salariats riscan de rejónher Pòl Emplec. « Nos fariá la filiera complèta, despuei concebre lei pargues PV, fins qu’a mestrejar la produccion despuei nòstre centre de telegestion, passant per la fabricacion de panèus ».
 
Ja a Gardana, lei panèus, que v’assegura Arnaud Mine, son a 50 % fachs de compausants fabricats en França, e pus precisament en Lengadòc.
 
Aqueu pargue foguèt creat amb lo sosten de la Comuna de Gardana, proprietària dei terrens que lo pargue li arrenda.
 
Vesina de la peiriera de Malespina que mena la societat Durance Granulat, la creacion dau pargue fotovoltaïc foguèt montada amb una collaboracion interessanta.
 
Lo crassier es un luec sens estabilitat, onte pòu se comborir de lignit pendent d’annadas, amb formacion de cavitats escondudas, dangeirosas. Adonc lo terralhatge foguèt menat per Durance Granulat, qu’aurà carrejat d’un endrech a l’autre mai de 230 000 tonas de tèrras e autrei materiaus per estabilizar çò qu’es finalament devengut una còla artificiala.
 
Aquí leis ectaras de panèus privaràn pas Provença de tèrras a facturar . E pagaràn la comuna amb una renda de 200 000 €/an, que li permetrà de menar d’autrei projèctes d’energias renovelablas au sieu.