Un centenau de personas se son acampadas a Crespinh, lo 15 d'abriu, per saludar la memòri de "Padena" alias Robèrt Marti, que nos quitèt dons ans fa.

 

Crespinh (Avairon), tanben vilatge ont naissèt l'escrivan màger Joan Bodon... que Robèrt Marti butèt a la creacion de l'Ostal Joan Bodon...E justament es l'Esplanada Robèrt Marti que mena a l'Ostal Joan Bodon.

 

Robèrt Marti, fondator, entre autres, de l'Ideco, leis edicions de l'Institut d'Estudis Occitans, fuguèt encara aubergaire, mestier que li faguèt crear lo personatge de Padena, que vendrà lo  comic emblematic d'Occitània.

 

La jornada se debanèt promièr a Crespinh per descobrir la placa en preséncia dau Cònsol dau vilatge, M. André At que menèt la ceremònia en partida en bòna lenga nòstra (çò qu'es pron rare e que fau saludar), de Karine Clément, cònsol de Naucèla, Vincenç Andrieu, president de l'Ostal Joan Bodon e Èric Fraj, actual president de l'IEO Occitania Pirenèus Mediterranea. La festa se continuèt au restaurant des Voyageurs de Naucèla ambé de lecturas de tèxtes de Robèrt Martí.

 

Josiana Daunís Martí, sa veusa, a regalat lo monde ambé de tròç deis espectacles de Padena que son sortits en DVD

(ne'n publicarèm mai dins la revista de mai-junh. Esperant aquò perque pas legir lo libre cap d'òbra de Robèrt Marti ?)

Lo 19 d'agost passat, convidats per Josiana Daunis-Martí, sa veusa, lo monde s'amassèron a l'Ostal Joan Bodon  (Crespinh, 12) per rendre omenatge a Robèrt Martí conegut tanben jol nom del personatge de "Padena" que creèt dins las annadas 80.

 

Robèrt Martí foguèt lo paraulièr de Eric Fraj dempuèi d'annadas. Fraj acompanhat de Morgan Astruc a la guitarra, regalèt lo public ambe la poesia de Martí dins una emocion partejada. Claudi Alranc venguèt puèi saludar l'art de Padena e de la dificultat de l'art del borlesc e de far rire son pòble, dins sa lenga e de nos far escacalassar de rire ambe tres peçòtas qu'aviá dins sa berreta. Mirèia Braç nos legiguèt un extrach de "L'ombra doça de la nuèit" un roman de Robert Martí, e Alan Roch saludèt lo president de l'I.E.O que foguèt de 1986 a 1997. Olivièr Dalhut "Rasquinhòl" venguèt saludar lo que li mostrèt lo camin de la creacion occitana e Florant Mercadièr nos regalèt de qualques padenadas coma per de dire que la vida contuniava e que l'esperit del grand òme bofava encara dins las velas de la creativitat de las generacions seguentas.