La tiera Oui la Provence finalament siguèt depausada per l’eleccion regionala de junh venènt. Arvei Guerrera, conselhier regionau Poc-EELV entre 2010-2015 la menarà a partir dei Bocas dau Ròse, Ana-Maria Sgaravizzi dins lei Aups Maritimas, Pascau Recotillet dins leis Aups d’Auta Provença, Michèu Prat dins lei Auteis Aups, Ana-Maria Hautant, ela tanben conseilhèra regionala amb Arvei Guerrera entre 2010-2015, per la Vauclusa, e enfin Didier Cade dins Var, onte bailèja l’associacion d’oposicion a la linha nòva dau TGV vèrs Niça.

 

S’i tròba de monde de la societat civila a costat d’un ventalh de militants dau Partit Occitan mai tanben dau Partit de la Nacion Occitana. Pasmens la magèr part son de monde que venon de totei lei orizonts puslèu professionaus e sociaus que politics. De notar la preséncia dins leis Aups Maritimas de l'artista Ben e de la cantarèla Zine.

 

Ansin de Josep Delofeu, linguista a l’universitat o de Montserrat Laucoin, ex bailèsa de cafè-teatre, d’un escrivan de teatre coma Gilabert Combe, puei d’artistas, de professors, psicològas, retirats de la Sncf, eca. A l’imatge de la societat que vòlon representar.

 

Dins l’arèna politica regionala, seràn segur vists coma lei “pichons” a costat de la tiera que presenta l’actuau president dau Consèu Regionau, Renaud Muselier, amé de monde vengut tant de La République en Marche coma de son pròpri partit Les Républicains. D’aqueu podem remarcar que, dins sa tiera presentada dins lei Bocas dau Ròse, presenta Bruno Genzana a la novena plaça, qu’es d’un autre latz delegat au Consèu Despartamentau de la Lenga e Cultura Provençala. E mai d’aquò lei curiós trobaràn en trentunenca plaça, en principi eligibla, lo baile dau Collectiu Prouvenço.

A gaucha, un malaise bòrd que La France Insoumise presentarà pas de tiera, après lo refús d’EELV d’i anar amé la còla de JL Mélenchon, que comptava sus una tiera de recampament.

 

EELV per tant l’i serà ben, amé Jean-Laurent Félizia, mai amé lo PS, le PCF, GRS, Generation.s e lo Mouvement des Progressistes, dins una tiera comuna, mai sensa Lutte Ouvrière que tròba lo mejan de presentar sa tiera menada per Isabelle Bonnet.

 

Sotalinham la preséncia de l’ecologista de drecha Jean-Marc Gobernatori, que depausa una tiera au nom de Cap Ecologie.

 

Puei segur lo Rassemblement National l’i serà amé l’intencion de ganhar, bailèjada sa tiera per Thierry Mariani, vengut eu de Les Républicains fa pas manco dos ans, e que, en 2010, èra cap de tiera de la drecha ai Regionalas. Quin percors !

 

Encara es pas acabat bòrd que la transfuga dau RN, Valérie Laupies, serà cap de tiera per la còla d’Eric Zemmour, amb un nom que farà data dins lo monde dau populisme regionau : “Zou la liste qui vous débarasse du système”, pas mens...

Candidata dau PS a diferenteis eleccions despuei una quingena d’annadas dins lo relarg sestian, Gaëlle Lenfant, bibliotècaria universitaria, acusa lo polemista d’extrema drecha Eric Zemmour, de l’aver constrencha a un bais en 2006 an una universitat d’estiu dau PS a La Rochelle.
 
La joine frema s’i seriá trobada en un atalhier amb d’autres militants e l’òme que se fa ara un nom sus lei cadenas de TV de Bolloré. E de contar : “Zemmour arriba, s’asseta sus la cadièra davant de ieu, me reconéis, me saluda e me demana ce qu’a pogut mancar dei discors, que li en fau lo resumit. Quand l’atalhier s’acaba me dreissi, eu tanben, m’aganta lo còu e me ditz “qu’aquela rauba te vai ben, sas ?” e alòr me baisa, per fòrça. Me siáu vista tant espantada qu’ai ren poscut faire que de le rebutar e fugir “

Lo remembre traumatic d’aquel episòdi, a la joina frema, d’alòr 21 ans, li es vengut a mirar una aficha pegada sus lo chantier sestian d’un bar emblematic, lei 2G, dubert en 1791, e a l’ora d’ara en refeccion. Lo gestionari se’s dich estonat ; lo disabte un comandò d’ultra drecha, lei Camisas Blancas, aviá penjat l’aficha pre-electorala dau benlèu candidat a la presidenciala de 2022, e siguèt finalament despenjada lendeman.
 
“Fa d’ans mai lo desgalh l’i es encara” a comentat la candidata ai regionalas de junh Gaelle Lenfant. Sus lo facebook de sa candidatura, lei criticas pauc delicatas an fa flòri, quasi sempre de monde utilisant un escais nom : “ parlar d’agression sexuala an aqueu nivèu es una insulta ai vertadièrei victimas de viòl”… “La gaucha es tant galèra que siatz a faire de cops bais ?” “La memoria l’i reven coma d’asard, vint ans puei e a un an de la Presidenciala”; “quant es pagada per racontar aquò ?” ; e tot de la mema aiga….