Segond acte, dins la nuèch dau 22 au 23 de mars 2013, a la periferia de Sanari, aqueu còup. Mai greu, bòrd que l’engenh peta còntra la vitrina d’una autra agéncia immobiliària. Aqueu còup es escrich « FLNP » en luec de « FNLP » coma a Gareut. E a costat « Prouvenço Libra ». Li aurà degun de nafrat.
Tresen còup, lo sièis de mai, un diluns, a Draguinhan, davant una agéncia bancària. E aqueu còup es lo retorn dau sigle « FNLP ». Exit « FLNP ». La Polícia Judiciària de Tolon e la Sota Direccien de l’Anti Terrorisme dau Parquet de Paris un còup de mai son sasits.
Levat d’una assai de borrolar lei cartas de la part dei pausaires de bombas, fau examinar un pauc son biais d’escriure sa revendicacien. Utilisèron a Sanari una bèla mescladissa grafica : lo mistralenc « Prouvenço » d’un costat, e lo classic - am’una deca « Libra » de l’autre. Nòstrei legèires sàbon que « libra » es, siegue una libertat presa amé la paraula normativa « liura », siegue un biais de dire locau qu’escapariá a nòstra coneissénça.
S’aqueu biais d’escriure es pas conscient de sei decas, es beleu alora tot simplament que lei pausaires sàbon pas la lenga, au mens escricha, levat de l’aver entenduda, o legida sensa vertadiera atencien. De tot biais s’es verai que « quau ten la lenga tèn la clau » siam pas encara lèsts de durbir la pòrta de la veritat sus aquel
afaire
.