De mon jardin, veio passar la vesina en joging. Se disem bonjorn de luenh. De pron luenh, chascuna d’un latz dau chamin. Es estressaa, se vei. Me ditz que duerme mau. Son òme e ela son a l’ostau, travalhan plus. Vai faire un viron a la ribiera per préner l’er. Se parlam mai la conversa es a distancia.
Entre clavier de desinfectar e supermarchat d'evitar
Mon òme travalha !
Chasque jorn vai a son burèu per respòndre au telefòne e ei messatgis. A l’ostau es pas parrier : lo tele-travau es pas la concentracion maximala. L’ambient l’i es pas. A achaptat per desinfectar l’ordinator, lo telefòne, lo burèu, Avem lavat les toalhons a l’ostau. Per eu, la situacion li fai socit, economicament. Lo despartament compta sus lo torisme e sabem pas que sarè l’estiu. Les estacions d’esquí an barrat sens bruch. Disián encar la meteo per la nèu a la tele que l’i aviá plus dingun !
Se retirar
Era lo darrier jorn per una de ses collegas. Les autras son en tele-travau. Per ela era ben lo darrier jorn. Lo darrier de 39 ans de bòns servicis. Se retira. Gis de collegas, gis d’aperò, o benlèu plus tard après la raissa que passam. Champanha pasmens, a dos. Per astre, lo virús me rendèt pas jarosa.
Operacion supermarchat
Fau ben manjar e d’aquesta passa vau mielhs manjar ben. Donc fau emplenar lo frigò. Gis de problema per se parcar. I a larjament la plaça. De monde barrutlan come de puercs marauts en se tapant la bocha de sa charpa. Aquò leis apara pas dau ridicule. Lo monde au travau se chinan : Siás bèu amb ton masque ! M’an dich que semblavo Alain Deloin ! Dins lo magasin l’i a de tot, levat de lingetas. De tot biais es pas ecologique. Me ne’n passarai. Lo joine de la caissa a de gants, lo masque e un chapelon de papier. Li demando si aquò vai. Me ditz qu’es calme e encar mai d’après disnar. Lo consèu es bòn si l’i devo tornar.