Ren que d’amorçar un lume dinc chasque fogau francès podriá faire baissar la demanda electrica per l’equivalent d’una ciutat de quasi cinc cents mil abitants, coma Tolosa.
Segon RTE (Malhum dau Transpòrt d’Electricitat) la consomacion d’electricitat podriá arribar au recòrd de 88 000 megawatt vuei alòr que la produccion serà dau meme nivèu, adonc la marge seriá tant pichona qu’un eveniment nos previst podriá provocar la casuda dau sistèma.
Aqueu depend de la circulacion de l’electricitat dins un malhum fòrça complexe, e la casuda d’una part d’aqueu podriá provocar una reaccion en cadena.
Solet mejan per se ne’n aparar, amé de temperaturas que pòdon èstre mai que negativas, baissar sa consomacion. E de gestes simples va permeton : amorçar un lume dins la cambra d’a costat “que crema per lei armas dau purgatòri”, remandar a deman un bugada, netjar lei plat a la man, baissar lo caufatge quand lo monde se’n va fòra de l’ostau, amorçar la box de l’internet la nuech…
Ja en 2016-17 la paur d’una casuda electrica èra seriosa, mai a l’epòca èra deguda ai trabalhs de mantenença d’una bòna partida dau pargue nucleari francès.