Adonc li a un vòte occitan…
Amé 37 % Jean-Luc Mélenchon arriba en tèsta a Tolosa, e tot parier a Marselha, mai amé « ren que » 31 %. E la ràdio France Info, que consacra un article e tres cartas au vòte dei tres premiers d’aquel escrutinh dau 10 d’abriu, confierma coma aqueu vòte mélenchonista se concentra entre frontièra italiana e espanhòla.
Leis Aups occitanas, la Cevena, Montpelhier, fins qu’ai Pireneus, una bèla part dau Nòrd Occitan… e Paris votan lo mai per lo candidat dau testarditge nacionalista de gaucha, que per son tresen assai, auriá poscut pervenir au segond torn d’aquela presidenciala.
Perqué li a escapat ? Es pas nòstre subjèct, que degun es lest a agotar tant lei responsas serián complèxes. Mai una causa es segura, lo monde a pas votat insomés entre Alsaça e Sud Bretanha, nimai dins tota la plana sota Paris.
E tanben li a agut un vòte Le Pen, mai aqueu, es occitan… entr’autrei : tòca tot lo territòri manca aqueu deis aglomeracions que comptan au nivèu economic e que concentran leis activitats culturalas que demandan un budgèt : Lion, Nantes, Tolosa, Marselha, Paris segur… Lo monde dei ciutats qu’entraïnan lo desvolopament economic, aqueu, a votat Emmanuel Macron. Lo vòte dau president-candidat tòca l’oest, justament aquela Leura atlantica, lo relarg de Bordèu, o aqueu de Paris, la Normandia onte se pòdon concentrar la granda part de l’activitat economica dau sector terciari.
Es ara de vèire se, dins doas setmanas, lo vòte blanc que podriá aprofiechar premier a Marine Le Pen, se concentrarà ailà onte justament lo monde a puslèu votat Insomés.