Encara ministre deis Afaires Exterior Espanhòu, Josèp Borrell assaja de blocar un projèct engatjat entre Catalonha e Region Occitanie. S’agis per lei doas entitats de passar un acòrdi per un “corredor mediterràni de la 5G”.
Per la votz de son segretari José María Muriel Palomina, lo ministre a fa conéisser au conselhier catalan dei Politicas digitalas, que lo projèct podiá pas èstre aqueu d’una “nacion” mai d’una “region”, e qu’una “region” aviá ges de competència per ne’n discutir am’una entitat forastièra.
Una briga tròp tard per Monsur Muriel Palomina, qu’a desvelat qu’anirà a Bucarest en companhia de son omologa de la Region Occitanie per signar l’acòrd de subvencions europencas pròches dei nòu (9) millions d’€uròs per menar lo projèct.
Segon Muriel Palomina, Borrell auriá adonc telefonat a la Comission Europenca per assajar de blocar l’acòrd. “Encara una obsession de Borrell !” a comentat l’elegit catalan.
Ex president dau Parlament Europenc, en 2004,Josèp Borrell podriá èstre lo prochan capolier de la politica forastièra de l’Union Europenca, se lo Parlament l’i elegisse bèn lèu. S’es fa aremarcat mai que d’un còp per de declaracions d’òdi ais independentistas catalans, o encara per son biais de pensar la conquista american de l’Oest : “qu’a pas mai tuat que tres o quatre Indians”.
Comentàri dau nòu president de la cambra de comerç catalana, Joan Canadell, considerat coma independentista : “vèsi aquela decision coma un nòu fren au desvelopament de Catalonha”.
Lo project de 5G podriá favorisar lei transpòrts de tota mena entre lei doas entitats de Catalonha e Occitanie, e s’inscriure dins un ensems mai larg au nivèu mediterranenc.
La 5G que planifica l’Union Europenca, per milhorar la conectica dau malhum mobile.