A la jornada intersindicala deis ensenhaires e de la recerca s’i parlava salaris, biais e condicions de trabalh, e recrutaments, mai tanben de s’acarar ai projècts governementaus de Lèi programatica de la Recerca (legissètz Aquò d’Aquí 331)…
E pasmens leis ensenhaires d’occitan-lenga d’Òc l’i èran mai que d’un còp acampats amé sei bandièras.
Es que la Federacion deis Ensenhaires de Lenga e Cultura Occitana (Felco) demandava a sei sòcis d’i portar pèire.
“La Felco es pas un sindicat, mai una associacion professionala...Aquò dich leis ensenhaires d’occitan lei regardan” lo fèbla nombre de pòstes creats au “Capes – quatre e un per l’agregacion – per trentra tres despartaments...de professors que fan fin qu’a cinc establiments...e que son pas remplaçats segurament quora s’enanan”.
Lei profs d'occitan se destrian dins lei passa carrièras
Au mens a Montpelhier e a Nimes lo monde de la Felco adonc aurà fa passa-carrièra ensems amé son materiau militant e dins lei cortegis sindicaus.
A Nimes lo camion dau Snes aprofitava meme dau saxofonista Danis Galvier, dau grope Coriandre, sòci de la Felco.
La Felco a fa conéisser sus son Facebook l’imatge de Montpelhier, Matieu Peitavin nos a mandat aquela de Nimes.
Lo monde ensenhaire s’es fach vèire coma monde ensenhaire d’occitan, ce qu’es pas ren. La rason ? ne'n parlam amé Matieu Peitavin a Nimes : "avançam ara dins lo mestier amé la paur au ventre. La marginalizacion en causa de la refòrma dau collègi, dau licèu e deis esparnhas dau govèrn, lo mesrprés s'es jamai tant fach sentir !"