Lei Pargues Regionaus de Provença se dison delaissats per lei candidats ai Regionalas

Vaquí que lei pargues naturaus regionaus  s’inquietan a l’ora que leis eleccions regionalas se debanan. « Siam socitós de gardar aquel ligam privilegiat ‘mé la Region que nos dona la Lèi despuei totjorn » que ditz Bernat Clap, lo president dau Malhum Provençau dei Pargues Naturaus Regionaus, eu president dau PNR dau Verdon.
 
E d’ajustar qu’es « important d’entendre ce que lei candidats portan coma vision ».
 
Per lei elegits d’aqueleis estructuras de preservacion dei territòris, lei candidats ai Regionalas demoran muds sus aquela question.
 
Dins lo grand tremolament territoriau que leva de poder a de collectivitats e ne’n crea d’autrei, « siam pereu vigilants ai mejans cosentits a la mesa en òbra de la charta de chasque Pargue, a travèrs lo sosten a son engènieria » perseguis monsur Clap.
 
Es que lei nòu pargues de Provença (Camarga, Aupilhas, Leberon, Santa-Baume, Baronias, Ventorn, Verdon, Preaups d’Azur, e Cairàs) an creat son associacion fa quatre ans, per portar de projècts comuns, e que vòudrián vèire aqueu trabalh sostengut au nivèu financier e politic.
 
Espèron ara que lei candidats parlaran mai dei pargues dins son discors.