En Avinhon dos arquitectas acòrdon bastir e respect de l’environament

Lo musèu Requien d’Avinhon, aqueu dei colleccions en sciencias naturalas, prepausa fins qu’au premier de novèmbre una mòstra concebuda per Ania e Bernat Vaton, arquitectas, ‘mé lo sosten de Provença Tèrra d’Òc, l’IEO de la Vauclusa.
 
« La piada de l’òme dins l’environament » tracta mai que tot de l’emprenta de l’activitat umana dins lei territòris naturau, dau biais de l’acordança possible de l’una e de l’autra, a travèrs lo concepte de desvolopament sostenible e de sa traduccion de bastiment d’auta qualitat environamentala.
 
Lei dos arquitectas d’Aurenja sabon de que parlan, bòrd qu’an passat sa vida a bastir en acòrd amé lei territòris de Provença, son climat e lei particularitats tant de son plantum coma  de sa geologia. Una cambada ecologica integrala bòrd que s’interessava au biais tradicionau de gestionar de mai que d’una generacion, ‘mé sei materiaus, e sa saviesa.

A la racina d’aquela mòstra, lei dos arquitectas nos dison lo constat : « despuei mantunei decenias nòstra societat de subreconsomacion degalha a chapauc nòstre environament naturau, e escafa lei respònsas localas que l’Òme podriá metre en òbra per respectar son environament ».
 
L’intrada es liure e se fa de 10 a 13 oras e de 14 a 18 oras chasque jorn de la setmana levat dei dimenges e diluns.