Toi lu geològues dau monde conoisson ben lu gres d'Anòt. Lu afogats d'escalada tanben, fins a l'Australia. Mai numeros son li gents de la region de Niça que non lu conoisson. « 5000 personas l'i venon per an, mentre que 5000 per jorn passan en li gòrjas de Verdon » ditz Joan Mazzoli, adjonch ai Finanças, a la Natura e a l'Espòrt. « Porriam ne'n reçaupre de 15 a 20 000 l'an » ajusta Joan Fenouil, eu adjonch ai Afaires Sociaus e ai Òbras.
Lo site, classat monument naturau en lo 1924, prepausa encuei un solet camin senhalat per sa descubèrta. L'i trobam un plantum particulier, ambé lo phagnalon rupestre d'Annot Son lu rocàs de Fontainebleau, mas au Miegjorn. Un iceberg de gres dins un ocean vèrd. La municipalitat es conscienta d'aqueu tresòr. A confidat un estudi au burèu Altéa, d'Antibol, per vèire quali son li possibilitats de « bastir una identitat toristica de plena natura, embe d'escalada, de passejadas tant a pè coma a cavau, VTT » ajusta Joan Mazzoli.
Anòt vòu atraire lu toristas en defòra de la sason d'estiu
Es un espàci naturau sensible, bornat per una barrièra reconoissuda, lo camin de fèrre dau Tren dei pinhas, e la risca de casuda dei rocàs. Fins ara aquela particularitat apara li espeças rari. Es l'espaci dont si vira aüra la municipalitat per atraire de monde dins la comuna. « Avèm abandonat nòstra politica d'esqui nordic, tròp costosa e aleatòria » dison lu elegits.
Per canalisar lu escaladaires, s'adreiçan a d'associacions especializadas per fin de desvolopar de vias d'iniciacion. Parlan d'un club : « Vive les gestes ».
Comenceran per melhorar l'accès ai vias d'escalada, e au site istoricò-legendari « la Cambra dau Rei », que seria estat massacrat per lu Sarasins. Son prevists de panèus d'interpretacion per li familhas, tant lu joves coma lu vielhs. Partènt dau vilatge, doi itineraris serion adobats, un cort per doi oras e mieja, un mai lònc de cinq oras e mieja. La rara serà equipada de bornèus wifi, embe de comentaris per lu smartfònes.
Emb'aqueu projècte, Anòt vòu atraire lu toristas en defòra de la sason d'estiu. « Ja lu Italians venon tre Pascas, e li dimenjadas de mai e junh, la frequentacion es fòrta, » nos ditz encara Joan Fenouil, « coma en setèmbre e octobre, gracias au tren a vapor » qu'arriba cada còp embe 150 personas.
Se l'estudi a costat 50 k€ levat li taxas, la mesa en òbras dau projècte, ela, es evaluada a 300 k€, embe una participacion de 80% de l'Union Europenca, embe lu Consèu Regionau e Generau dei Aup d'Auta Provença.
Mai tot aquò depende d'un avis de la Comission despartamentala dei Sites e Païsatges. Sauprem en octobre. Cau esperar que lo projècte acabarà pas, sagatat coma lo Rei de la legenda...